سپاه پاسداران خلیج کې د امریکا یوه بې عملې بېړۍ لنډمهال لپاره ضبط کړې
د عکس سرچینه، Centcom
امریکايي چارواکي وايي د ایران سپاه پاسداران ځواکونو د فارس خلیج اوبو کې د دوی یوه بې عملې بېړۍ د څه وخت لپاره ضبط کړې، خو د امریکايي ځواکونو په نږدې کېدو سره یې بېرته پرېښې ده.
د امریکا پوځ مرکزي قوماندانۍ سېنټکام ویلي دا لانجه له تقابل او نښتې پرته پای ته رسېدلې.
دا بې عملې بېړۍ د امریکايي ځواکونو اړونده څارونکې وسیله بلل شوې چې د فارس خلیج نړیوالو اوبو کې یې مالومات راټولول.
دا وسیله د سمندر څارولو لپاره پر بېلابېلو کمرو، رادار او حسګرو سمبال ده.
سپاه پاسداران تر اوسه پر دې موضوع تبصره نه ده کړې، خو د ایران ملي امنیت عالي شورا ته یوې نږدې ویب پاڼې لیکلي ایراني ځواکونو دا ګام د بېړیو تګ راتګ د خوندیتوب ډاډمنېدو لپاره اخیستی و.
سېنټکام ویلي دا پېښه دوشنبه رامنځته شوه او د سپاه پاسداران اړوند شهید بازیار جنګي بېړۍ دا وسیله ځان پسې راکښله.
ایراني ځواکونو د یوې امریکایۍ بېړۍ او چورلکې په ورنږدې کېدو وروسته، دا څېړونکې وسیله بېرته اوبو کې خوشې کړې ده.
د امریکا پوځ مرکزي قوماندانۍ د دې پېښې یوه لنډه ویډیو هم خپره کړې.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د امریکا د سمندري ځواکونو یوه ځايي ویاند تیموتي هاکینز رسنیو ته ویلي د دوی ځواکونو سپاه پاسداران ته پیغام ورکړی چې وسیله د دوی اړونده ده او که اړتیا شي، نو بېرته ترلاسه کېدو لپاره به یې ګام واخلي.
د سېنټکام اعلامیه کې راغلي چې پر ټکنالوژۍ دغه سمباله وسیله د پټو او حساسو مالوماتو راټولېدو لپاره نه کارول کېږي.
دا پېښه داسې مهال شوې چې تېرو دوو کلونو کې د امریکا او ایران ترمنځ د خلیج اوبو کې د تقابل پېښې کمې شوې.
دا پېښې په ۲۰۱۸ تر هغې وروسته ډېرې شوې وې چې د امریکا د مخکیني ولسمشر ډونلډ ټرمپ حکومت ایران سره له اټومي تړونه د وتلو اعلان وکړ.
