چين وايي له تایوان سره نژدې پوځي تمرینونو ته دوام ورکوي

که څه هم د چين پوځ مخکې اعلان کړی و چې يکشنبه (اګست ۷) به د تايوان په شاوخوا کې پوځي تمرينونه پای ته رسوي خو نن يې د دې تمرينونو د دوام خبره کړې ده.

د چين پوځ ويلي، دوی به د اوبتل او سمندري بريدونو ضد تمرينونه ترسره کوي.

د تايوان په شاوخوا کې د بېجېنګ څلور ورځني پوځي تمرينونه دې ټاپو ته د امريکايۍ سياستوالې نانسي پلوسي د سفر په ځواب کې وو.

چین وايي‌ د سیمې سوله او ثبات تایوان ته د اغلې پلوسي سفر "جدي خطر" سره مخ کړي.

تايوان پر چين تور لګولی چې له دغو تمرينونو پر تايوان د بريد لپاره کار اخلي. خو دغه هېواد د دوشنبې په ورځ وويل، چينايي بېړۍ او الوتکې د تمرين پر مهال تراوسه د دوی اوبو ته نه دي ننوتلې.

امریکا، استراليا او جاپان د چين دغه تمرينونه غندلي او ويلي يې دي، د دوی موخه د چين او تايوان تر منځ د تايوان تنګي کې وضعيت بدلول دي.

تايوان وايي، چينايي الوتکو او بېړيو په پرله پسې ډول د تمريمونو پر مهال په تنګي کې له "منځنۍ کرښې" تېری کړی. د تايوان د فاع وزارت هم د دوشنبې په ورځ وويل، دا کرښه له ۱۹۵۰ کال راهيسې يو پټ تفاهم دی چې شتون يې يو واقعيت لري.

واشنګټن دا هم ويلي چې بېجېنګ تايوان ته د نانسې پلوسي د سفر په غبرګون کې د اقليمي بدلون په ګډون په ځينو نورو برخو کې له امريکا سره همکاري پرې کړې ده.

اغلې پلوسي چې د چین د پالیسو تونده منتقده ګڼل کېږي، تېره سې شنبه د بېجېنګ له خبرداري سره سره تایوان ته ولاړه.

دا په تېرو ۲۵ کلونو کې لومړی ځل شو چې د دومره لوړې کچې یو امریکایی چارواکی دغه ټاپو ته ځي.

د امریکا د استازو جرګې مشرې د دغه سفر پر مهال وویل چې نړۍ د زورواکۍ او دیموکراسۍ ترمنځ له انتخاب سره مخ ده.

بېجېنګ تایوان ته د یوه جلا شوي ولایت په توګه ګوري چې د اړتیا په صورت کې کولی شي په زور يې ونیسي.

بېجېنګ د نړۍ مشرانو د هر هغه اقدام پر وړاندې له غوسې ډک غبرګون ښيي،‌ چې د دغه ټاپو د رسمیت پېژندلو نښه نښانه ګنل کېدای شي.