امریکا پوځ وايي، سوریه کې یې د داعش یو مشر په ډرون برید کې وژلی
د عکس سرچینه، Getty Images
د امریکا متحدو ایالتونو پوځ وايي، په سوریه کې یې د اسلامي دولت نومې ډلې 'داعش' یو مشر په یوه ډرون برید کې وژلی دی.
د امریکايي پوځ په خبره دغه داعش مشر ماهر العقال نومېږي، چې په ټوله نړۍ کې د یادې ډلې له پنځو مخکښو مشرانو یو و او له منځني ختیځه بهر یې د دې ډلې پراختیا چارې سمبالولې.
د امریکايي پوځ قومندانۍ په وینا د دې سړي وژلو عملیات د سوریې په شمال لوېدیځ کې جیندایروس ته نژدې تر سره شوي او ملکي خلکو ته پکې زیان نه دی رسېدلی.
د امریکايي پوځ یوه ویاند ویلي، د سیمې پر وړاندې له خطرونو سره به د دوی مقابله روانه وي.
تازه برید له هغې پېښې پنځه میاشتې وروسته کېږي چې د همدې سوریې په ادلیب کې د داعش مشر ابو ابراهیم هاشمي القریشي د امریکايي ځواکونو یوې چاپې پر مهال په یوه چاودنه کې ځان وواژه.
د روان کال مارچ کې اسلامي دولت نومې ډلې 'داعش ' د خپل مخکیني مشر ابو ابراهیم القریشي وژل کېدل تایید کړل او د نوي مشر نوم یې اعلان کړ.
هغه مهال یوه غږیز پیغام کې چې پر انټرنېټ خپور شوی و، د داعش له لوري ابوالحسن الهاشمي القریشي د نوي 'خلیفه ' په توګه اعلان شو، خو د نوموړي پېژندګلوۍ په هکله هېڅ جزیات نه و ورکړل شوي.
دغه راز په هغه پیغام کې داسې څه نه و ویل شوي، چې ابو ابراهیم القریشي چېرې او کله ووژل شو.
داعش یو مهال د عراق له ختیځه نیولې د سوریې تر لوېدیځ پورې پر نژدې ۸۸ زره مربع کیلومتره ځمکه واکمني کوله او پر نژدې اته میلیونه خلکو یې خپل سخت دریځي اصول وضع کړي وو.
