تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
''تېرو ۱۰ ورځو کې ۱۰ تنه نرښځي خېبرپښتونخوا کې وژل شوي او ټپیان شوي دي''
په خېبرپښتونخوا کې د نرښځیو د ټولنې مشران وايي له تېرو څو مياشتو راهيسې د دوی پرضد د تاوتریخوالي پېښې ډېرې شوې چې په ترڅ کې یې لسګونو نرښځیو ته مرګ وژبله اوښتې ده.
دوی له حکومته غوښتنه کړې چې د امنیت لپاره یې سملاسي گامونه پورته کړي.
په پېښور کې د نرښځیو د حقونو يو فعال او مدافع وکيل تيمور کمال وايي یوازې په تېرو ۱۰ ورځو کې ۱۰ تنه نرښځي د تاوتریخوالي په پېښو کې وژل او ټپيان شوي دي.
د ښاغلي کمال په وینا په دې لړ کې تازه پېښه اوړمه ورځ د پېښور په قصه خوانۍ بازار کې رامنځ ته شوه چې یو نرښځی په ډزو ووژل شو.
دغه راز څو ورځې وړاندې په مردان کې هم د نرښځیو پر دیرې په یوه برید کې یو تن نرښځی ووژل شو او یو بل ټپی شو.
د هغه په وینا څو ورځې وړاندې په مهانسیره کې هم پر نرښځیو په یو برید کې څلور نرښځي ټپیان او یو تن ووژل شو.
د معلوماتو له مخې له ۲۰۱۵ کال راهیسې ۷۵ تنه نرښځي په خېبرپښتونخوا کې په بېلا بېلو پېښو کې وژل شوي دي.
د نرښځو مدافع وکیل تیمور کمال وايي کله چې نرښځي ووژل شي د هغوی کورنۍ یې مړي اخیستلو ته چمتو نه وي ځکه نو د نورو نرښځیو لخوا په هدیرو کې خاورو ته سپارل کېږي.
د نوموړي په وینا د نرښځیو د حقونو لپاره هلې ځلې کېږي خو دا به ډېر وخت ونیسي چې خلک پر دې قانع کړای شي چې نرښځي هم انسانان دي.
په تېر کې د خېبر پښتونخوا ایالت په ځینو سیمو کې د نرښځیو پر نڅا او سندرو ویلو بندیز هم لګول شوی و او نرښځي نه پرېښودل کېدل چې ځینو سیمو ته لاړ شي.
چارواکي ویلي و بندیز یې د خلکو په غوښتنه په دې خاطر لګولی دی چې ځوانان د نڅاوو په محفلونو کې شخړې کوي، شراب څښي او ډزې کوي.
د نرښځیو د حقونو مدافعین نرښځې د ټولنې یو محروم قشر بولي او غوښتنه کوي چې باید حقونو ته یې پام وشي.
