هند کې د حجاب پر موضوع د ناندریو له کبله ایالتي ښوونځي تړل شوي

نوبل جایزه ګټونکې ملالې یوسفزۍ د هغو شپږ هندیو نجونو د ملاتړ غږ پورته کړی، چې غواړي له حجاب سره په ټولګي کې د کېناستو اجازه ورکړل شي.

د هند کرناټک ایالت دا محصلینې له څو اونیو راهیسې په خپل پوهنځي کې پر حجاب د بندیز پر ضد احتجاج کوي او ملالې یوسفزۍ دا بندیز 'بوږنوونکی ' بللی.

د دې بندیز له کبله په کرناټک ایالت کې د فرقه ییز تاوتریخوالي پېښو رپوټونه ورکړل شوي دي او له همدې کبله تر درې ورځو پور د ایالت ښوونځي تړل شوي دي.

په هند کې د دې موضوع پر سر ناندرۍ راپورته شوې او د کرناټک ایالت تر اعلی محکمې پورې رسېدلې ده.

یوې محصلې اعلی محکمې ته عریضه کې ویلي چې د هند اساسي قانون له مخې یې د مذهبي ازادۍ لړ کې حجاب کول حق دی.

بل لور ملالې یوسفزۍ چې په ۱۵ کلنۍ کې د نجونو زدکړو حق غوښتنې له کبله پرې طالبانو په سوات کې برید وکړ، له هندي مشرانو غوښتي چې ''د مسلمانو ښځو څنډې ته کول پرېږدي. ''

۲۴ کلنې ملالې په یوه ټویټر پیغام کې ویلي:

''په حجاب کې تعلیمي ادارو ته د نجونو تګ مخنیو بوږنوونکې (چاره) ده. پر ښځو د لږ یا ډېرو کالیو اغوستو له کبله د اعتراض لړۍ روانه ده. ''

دې هندیو پېغلو له هغه وروسته احتجاج پیل کړ، چې د پوهنځي انتظامیې په ټولګي کې د حجاب له کاروولو منع کړې.

دا ناندرۍ د ایالت نورو سیمو ته هم وغځېدې او تېره اونۍ په یوه ویډیويي کليپ کې د حجابي ښځو پر وړاندې د یوه بل پوهنځي تړل شوې دروازې هم ولیدل شوې، چې له کبله یې احتجاجونه هم شوي.

بل لور هندو سخت دریځې ډلې بیا د دې بندیز ملاتړ لپاره هم راوتلې.

د ځايي رسنیو په رپوټونو کې ویل شوي، د دواړو لوریو تر منځ د سې شنبې پر ورځ د اخ و ډب پېښې هم شوې، چې ځینې کسان پکې ټپیان شوي هم دي. د ایالت اعلی وزیر بسوراج بومايي تر دریو ورځو پورې د تعلیمي ادارو تړلو اعلان تر څنګ له (زدکوونکو، محصلینو، استادانو او له ټولو کرناټک اوسېدونکو دارامۍ او یو موټیوالي) غوښتنه کړې.