مایک پينس: ډونلډ ټرمپ تېروتنه کړې
د عکس سرچینه، Reuters
د امریکا متحدو ایالتونو د پخواني ولسمشر مرستیال مایک پينس وايي، ډونلډ ټرمپ په هغه ادعا کې تېروتنه کړې، چې ګواکې کولای یې شوای، د خپلې بریا لپاره د ټاکنو پایلې بدلې کړي.
بل لور جمهوریتپال ګوند د جنورۍ پر شپږمه د امریکا کانګرېس پر ودانۍ د یرغل پېښې په تړاو د خپلو دوو مهمو پارلمان غړو د تحقیق مخه نیولې.
لیز چیني او ادام کینزینګر د ۲۰۲۱ کال په جنورۍ کې د کانګرېس پر ودانۍ د بلواګرو یرغل په هکله پلټونکې کومېټه کې شامل یوازیني جمهوریتپال غړي دي.
د یاد ګوند په یوه اعلامیه کې دواړه غړي د ''عادي وګړو '' قضايي تعقیب کې په مرسته تورن شوي چې د ''مشروع سیاسي خبرو کې د ګډون په حال کې وو. ''
د ښاغلي ټرمپ پلویانو د امریکا پر کانګرېس ودانۍ داسې حال کې یرغل کړی و، چې دغه ادارې د ۲۰۲۱ کال جنورۍ پر شپږمه د امریکا ولسمشریزو ټاکنو نهايي کولو او د جو بایډن بریا قانوني تایید ته چمتوالی کاوه.
هغه یرغل کې څلور کسان وژل شوي وو او یو پولیس افسر چې له ودانۍ یې د دفاع لړ کې سکته وکړه، دوې ورځې وروسته ومړ.
د کومېټې دیموکرات مشره لیز بیا د دې اعلامیې په هکله وايي، ''داسې ښکاري جمهوریتپال ګوند باور لري چې پر کانګرېس ودانۍ یرغل کوونکي په سیاسي خبرو کې د ګډون لپاره هلته تللی وو، حال دا چې مشروع سیاسي خبرې له تاوتریخوالي سره هېڅ اړیکه نه لري. ''
د عکس سرچینه، Reuters
رپوټونو کې ویل شوي، دا پرېکړه د جمهوریتپال ګوند په ژمنۍ غونډه کې د حاضرو ۱۶۸ غړو د رایو په اکثریت تایید کړه.
د جمهوریتپالو په غونډه کې ویل شوي، د دې رایې له مخې به د ګوند له دواړو غړو سره د دوی د ګوندي غړیتوب له لغوه کولو پرته ملاتړ ختم شي.
دواړو استازو د دې اعلامیې له خپرېدو مخکې له خپل لوري په دې هکله څرګندونې کړې.
د لیز چیني په اعلامیه کې په دې هکله ویل شوي، ''د جمهوریتپال ګوند مشرانو پخپله ځانونه د داسې یوه سړي یرغمل کړي چې ګومان یې کاوه، د ټاکنو پایلې به بدلې کړې او یرغلګر به چې ځینې په دسیسه او شرخوښۍ تورن دي، وبښي. ''
د ګوند یوه بل غړي میټ رامني بیا د دې دواړو کسانو ملاتړ کړی او په وینا یې ''ګوند ته ځکه شرم پکار دی، چې د رښتیا موندلو ته لیوال کسان سانسوروي. ''
ما حق نه درلود
د فلوریډا په اورلانډو کې د خبرو پر مهال مایک پينس د پخواني ولسمشر د ادعا په غبرګون کې وویل، ښاغلي ټرمپ ناسمه خبره کوله چې ګواکې جو بایډن له دې ''بریا تروړلې ده. ''
ښاغلی ټرمپ ادعا کړې چې که مایک پينس غوښتلای د ده په ګټه یې د ټاکنو پایله بدلولای شوای.
ښاغلی ټرمپ وايي، ټاکل شوې کومېټه باید پر کانګرېس ودانۍ د یرغل کوونکو پر ځای له ښاغلي پنس پوښتنې ګروېږنې وکړي.
خو ښاغلی پنس بیا وايي: ''ډونلډ ټرمپ تېروتنه کوي. ما د ټاکنو پایلو بدلولو هېڅ حق نه درلود. ولسمشري د امریکا په خلکو پورې تړاو لري. نوموړی زیاتوي: کله چې ۲۰۲۴ کال کې موږ بریالي شو د اوسني ولسمشر مرستیاله کاملا هریس به هم د ټاکنو پایلو بدلولو حق نه لري. ''
