تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د فرانسې لومړۍ مېرمن د جنسیت بدلولو جعلي تورونو پر ضد قانوني اقدام کوي
د فرانسې لومړۍ مېرمن بریجیټ مکرون د هغو انټرنېټې ګنګوسو پر ضد قانوني اقدام کوي، چې ګواکې دې جنسیت بدل کړې او نارینه زېږېدلې وه.
د لومړۍ مېرمنې په هکله لومړی د ښي اړخو پر یوه پاڼه دغه ډول جعلې ادعاوې خپرې شوې او وروسته د ګنګوسې خپروونکو لخوا لاس پر لاس شوې.
په دې جعلي خبرونو کې ادعا شوې وه، چې ګواکې مېرمن مکرون د یوه هلک زېږېدلې وه او د جین میکایل تروګنیوکس نوم ورته غوره شوی و.
دا نوم وروسته لسګونه زره ځله په خواله رسنیو کې یاد شو. تازه د مېرمن مکرون مدافع وکیل تایید کړې، چې نوموړې د قانوني اقدام تابیا لري.
د یادونې ده چې مېرمن مکرون له لومړني واده درې اولادونه لري، چې اوس لویان دي.
مدافع وکیل جین اینوچي اې ایف پي خبري اژانس ته وویل: ''هغې پرېکړه کړې، چې قانوني پړاو ته داخله شي او همدا اوس دا چاره روانه ده. ''
د ۶۸ کلنې لومړۍ مېرمنې پر ضد د جعلي ګنګوسو دا لړۍ هغو کسانو پر مخ بیوله، چې د دې له مېړه ولسمشر ایمانویل مکرون سره مخالفت کوي.
دې کې د واکسین ضد ښي اړخي او د کیو اې نون په نامه سازشي تحریک کسان هم شامل وو.
د فرانسې رسنیو معلومه کړې، چې دې ګنګوسو د ښي اړخو یوه خپرونه کې د نتاشا رې نومې یوې ښځې له لیکنې سرچینه اخلي.
د لیبرېشن ورځپاڼې په رپوټ کې ویل شوي، وروسته د دې موضوع په هکله پر خواله رسنۍ یو ټیوب د کوویډ ضد واکسینو یوې مخالفې ډلې او ښي اړخو فعالانو له بحثونو وروسته، چې ډېر لیدونکي لري، دا ګنګوسې نورو هم لاس پر لاس کړې.
