تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
قریشي: طالبانو ته دې د افغانستان ګاونډیو هېوادونو راتلونکې ناسته کې بلنه ورکړل شي
د پاکستان د بهرنیو چارو وزیر شاه محمود قریشي ویلي، هیله لري چې د افغانستان د ګاونډیو هېوادونو په راتلونکې ناسته کې به د افغان طالبانو استازو ته هم بلنه ورکړل شي.
نوموړي دا څرګندونې پنجشنبه اسلام اباد کې د طالبانو د بهرنیو چارو وزارت له سرپرست امیر خان متقي سره د کتنې پر مهال کړې دي.
د طالبانو د بهرنیو چارو وزارت سرپرست امیر خان متقي په مشرۍ د دې ډلې یو پلاوی دا مهال د پاکستان په رسمي سفر بوخت دی.
له دې سفر سره هممهاله همدا نن پنجشنبه اسلام اباد کې د افغانستان د ګاونډیو هېوادونو (ټرایکا-پلس) استازو خپلمنځي ناسته وکړه.
د افغان طالبانو پلاوي په دې ناسته کې ګدون نه درلود، خو وروسته یې د امریکا، چین، روسیې او پاکستان له استازو سره جلا وکتل او د ټرایکا-پلس ناستې په اړه مالومات ورکړل شول.
طالبانو د بهرنیو چارو وزارت سرپرست امیر خان متقي ویلي، د (ټرایکا-پلس) هېوادونو له استازو سره یې کتنه کې د افغانستان پر سیاسي او بشري وضعیت او د افغان دولت د کنګل شویو شتمنیو په اړه خبرې کړې دي.
نوموړی وایي، د امریکا، چین، روسیې او پاکستان استازو سره د افغانستان پر امنیتي وضعیت او د بد امنیو د مخنیوي په اړه هم استدلال کړی.
د پاکستان حکومتي چارواکي ټینګار کوي چې افغان طالبان له نړیوالې ټولنې سره تعامل غواړي، او باید چې نړیواله ټولنه هم له دې ډلې سره خبرو ته غاړه کېږدي.
د بهرنیو چارو وزیر شاه محمود قریشي همدا راز ویلي، په سیمه کې پر هغو کړیو باید کلک نظر وساتل شي چې افغانستان کې دننه او بهر سوله نه غواړي.
نوموړي نړیوالې ټولنې ته خبرداری ورکړی چې په افغانستان کې بې ثباتي لوی بشري او امنیتي ناورین رامنځته کولی شي، او د مخنیوي لپاره یې باید نړیواله ټولنه طالبانو سره تعامل وکړي.
یاده دې وي چې پر افغانستان له واکمنېدو راهیسې دا لومړی ځل دی چې د طالبانو یو جګپوړی پلاوی پاکستان ته سفر کوي.
تمه کېږي چې دا پلاوی به د خپل درې ورځني سفر په ترڅ کې د پاکستان له لومړي وزیر عمران خان سره هم وګوري.
ښاغلي خان پنجشنبه په یوه لنډ بیان کې ویلي، نړیواله ټولنه باید په افغانستان کې د بشري ناورین مخه ونیسي.
نوموړي ژمنه کړې ده چې حکومت به یې په دې برخه کې د طالبانو له حکومت او نړیوالې ټولنې سره تر ممکنه حده مرسته کوي.
پاکستان د هغو ګوتو شمېر هېوادونو په ډله کې دی چې له افغان طالبانو سره نږدې اړیکې پالي او دا مهال په کابل کې فعال سفارت هم لري.
