تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
نیپال کې د بس اوښتو پېښه کې لږ تر لږه ۲۵ کسان وژل شوي
نیپال کې پولیس وايي، د هېواد شمال لوېدیځ کې د یوه بس اوښتو یوه پېښه کې لږ تر لږه ۲۵ کسان وژل شوي او ګڼ شمېر نور ټپیان شوي دي.
د ځايي رسنیو رپوټونو کې ویل شوي، دغه بس په موګو سیمه کې سفر کاوه، چې د سې شنبې پر ماسپښین ناڅاپه له لارې ووت او پړمخه واوښت.
تر اوسه د دې پېښې د لامل په هکله څه نه دي ویل شوي، خو د ځايي رسنیو په ځینې رپوټونو کې ویل شوي، ښايي د بس بریک له کاره لوېدلي وو، چې له کبله یې پېښه رامنځته شوې.
په نېپال کې د موټرو پېښې بې مخینې نه دي او لاملونه یې هم کنډ کپر لویې لارې او د موټر نامناسبه ساتنه بلل کېږي.
د ځايي رسنیو په تصویرونو کې لېدل کېږي، چې اوښتی بس د یوې غونډۍ پاې ته پړمخ پروت دی.
ځايي پولیس وايي، مرستندویان د پېښې ځای ته استول شوي دي او په دې هکله یې پلټنه پیل کړې ده.
پولیس زیاتوي داسې ګومان کېږي، چې دغه بس کې سفر کوونکي ډېری کسان د داشین نومي مذهبي مراسمو ګډونوال وو چې بېرته کورونو ته ستنېدل.
دغه مراسم په نیپال او هند کې په پراخه کچه لمانځل کېږي.
