تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
"پر انسټګرام د ماشومانو پلورونکي" ونیول شول
په ایران کې درې مشکوک کسان له هغه وروسته نیول شوي چې ویل کېږي هڅه یې کوله د خواله رسنۍ انسټاګرام له لارې دوه ماشومان وپلوري.
د ایراني پلازمېنې تهران پولیسو مشر جنرال حسین رحیمي وايي، یو ماشوم شل ورځې مخکې زېږدلی او بل دوې میاشتنی و.
دغه ماشومان له مخکې د ۵۰۰ امریکايي ډالرو بدل کې اخیستل شوي وو او بیا د ۲۰۰۰ او ۲۵۰۰ امریکايي ډالرو بدل کې پلورل کېدل. له نیول شویو کسانو یوه ویلي:
'له بیوزله کورنیو یې ماشومان اخیستل او د ښه راتلونکي لپاره پر شتمنو خلکو پلورل. '
ښاغلی رحیمي وايي، پر انسټاګرام د 'ماشومانو پلور ' د اعلانونو له خپرېدلو وروسته پولیس خبردار شول.
نوموړی وايي، د تصویرونو پر دغه پاڼه یې داسې لس - پنځلس پاڼې وموندې او له هغه وروسته د دوو ماشومانو پلور په قضیه کې درې کسان ونیول شول.
نوموړی وايي، ماشومانو د پاملرنې ادارو ته سپارل شوي دي.
د پولیسو دغه جنرال وايي، نیول شویو کسانو ورته ویلي چې له بیوزله کورنیو یې ماشومان د لږ پیسو بدل کې موندلي دي. د ځوانو خبریالانو کلب نومې ټولنې لخوا په یوه خپره شوې ویډیو کې له نیول شویو کسانو یو وايي:
''له دې ماشومانو سره به مرسته شوې وه، چې ښه راتلونکی یې درلودلای وای. ''
په ایران کې دغه ډول دا لومړنۍ پېښه نه ده.
له دې مخکې د روان کال لومړیو کې په ګورګان ایالت کې چارواکو وویل، څلور ښځې او یو سړی یې نیولي چې بیوزله مېندوارو مېرمنو ته یې د روغتون او درملو لګښت ورکاوه او له زېږېدو وروسته به یې ماشومان ترې اخیستل.
په ۲۰۱۶ کال کې د کورنیو او ښځو چارو لپاره د ایراني ولسمشر د هغه مهال مرستیالې شاهیندوخت ملاویردي د هغو مېندو 'ډېرېدونکي ' شمېر له کبله اندېښنه وښوده چې احتمالاً خپل ماشومان پلوري.
د نوموړې په وینا بیوزلې، د نشې روږدیتوب، د ماشوموالي ودونه او د بې کورۍ په څېر (ځینې لاملونه) ښځې مجبوروي چې خپل ماشومان وپلوري.
