د بريتانيا لومړی وزير او د روغتيا وزير پر کورونا وېرویس اخته شوي
د عکس سرچینه، PA Media
د بريتانيا حکومت وايي د دغه هېواد لومړی وزير بورېس جانس د کورونا پر وېروس اخته شوی دی.
د بريتانيا د روغتيایي ادارې له طبي ازموينې وروسته معلومه شوې چې نوموړی د کورونا وېروس لري، خو نښې يې جدي نه دي او اوس يې ځان په خپل کور کې ګوښه کړی دی.
د حکومت له خوا په يوه بيانيه کې راغلي چې نوموړی به د کورونا وېروس د دې بحران اداره کولو کې د دولت مشري کوي.
دا په داسې حال کې ده چې د بريتانيا د روغتيا وزير مټ هېنکاک هم په کورونا وېروس اخته شوی دی. د نوموړي د کورونا وېروس نښې هم جدي نه دي او اوس په خپل کور کې قرنطين شوی دی.
لومړي وزير بورېس جانسن پر ټوېټر پاڼه ليکلي، ''په تېرو څلورويشتو ساعتونو کې مې لږ نښې درلودې. د کورونا وېروس ازموینه مثبته شوه، ما اوس ځان ګوښه کړی، خو د دې وېروس سره د مبارزې په موخه به زه د ويديو کنفرانس له لارې د حکومت د ځواب مشري کوم''.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
ښاغلی جانسن په وروستي ځل د پنجشنبې پر ورځ د لومړي وزير د دفتر مخې ته ليدل شوی و چې د روغتياپالانو څخه د مننې په پاره یې لاسونه پړکول. همدا ډول، نوموړي له ټولو هغو کسانو هم مننه وکړه چې له کورونو کار کوياو له يوه کوره بل کور ته د دغه وېروس د خپرېدو مخنيوی کوي.
ښاغلی جانسن به د حکومت مشري کوي خو تېره اوونۍ د نوموړي وياند ویلي وو که لومړی وزير د ناروغۍ له امله نشي کولی خپل مسوليت ترسره کړي، په دې صورت کې به د بهرنيو چارو وزير ډومنېک راب د حکومت چارې پر مخ وړي.
دا په داسې حال کې ده چې د وېلز ۷۱ کلن شهزاده چارلس هم په کورونا وېروس اخته شوی و. د يوه وياند په وينا ''اوس يې روغتيايي حالت ښه دی''.
د وروستيو شمېرو له مخې په بريتانيا کې ۱۱۶۰۰ کسان په کورونا وېروس اخته دي او ۵۷۸ کسان ترې مړه شوي.
