تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
کورونا وېروس: د جرمني لومړۍ وزيره انګلا مېرکل قرنطين شوه
د جرمني لومړۍ وزيره انګلا مېرکل له يوه ډاکتره سره تر ليدو وروسته چې د کورونا پر وېروس اخته دی ځان قرنطين کړی.
انګلا مېرکل ته د يکشنبې پر ورځ د دغې ليدنې په اړه ويل شوي وو چېرته چې نوموړې د کورونا وېروس د مخنيوي په موخه د نويو ګامونو اعلان کړی و.
جرمني د کورونا وېروس سره د مبارزې په موخه د راتلونکو دوو اوونيو لپاره له کورونو يا کار ځای بهر له دوو زياتو کسانو پر راټولېدو بنديز لکولی دی.
په نړۍ کې پر کورونا وېروس د اخته کسانو شمېر له ۳۰۰ زره اوښتی دی او ۱۳ زره کسانو یې له امله خپل ژوند له لاسه ورکړی دی. ۲۹ زره بيا ترې روغ شوي دي.
د کورونا له امله تر ټولو ځپل شوي هېواد ايټاليا کې د يکشنبې پر ورځ د ۶۵۱ کسانو د مړينې راپورنه ورکړل شوي. حکومت وايی تر دې مهاله په دې هېواد کې ټولټال ۵۴۷۶ کسان د دې وېروس له امله مړه شوي دي.
راپورنه وايي، روسيې د کورونا وېروس سره د مبارزې په موخه ايټاليا ته پوځي ډاکتران استولي دي.
د بريتانيا لومړي وزير بورېس جانسن، د مور د ورځې په مناسبت له خلکو غوښتي چې سږ کال مخامخ د میندو ليدو ته مه ورځئ او د ټيليفون يا انټرېنټ له لارې ورسره خبرې وکړئ.
نوموړی وایي، "په بريتانيا کې د کورونا وېروس پېښې په چټکۍ په زياتېدو دي". په دې هېواد کې تراوسه ۲۸۱ کسان له وېروس مړه شوياو ۵۶۸۳ تنه نور پرې اخته دي.
په افغانستان کې د کورونا وېروس له امله د يوه کس د مړينې خبر ورکړل شوی دی، د عامې روغتيا وزارت وايي مړ شوی کس د بلخ ولايت اوسېدنکی دی.
د افغانستان عامې روغتیا وزارت وایي، په تېرو ۲۴ ساعتونو کې د کورونا ۱۰ مثبتې پېښې شوې چې دوه یې په کابل کې دي. دوی وایي، پلازمېنه کابل کې ۲۲۰ نورې پېښې ثبت شوې چې د کورونا شک پرې کېږي.
افغانستان کې د روان وضعيت له مخې ښايي د کره شمېرو روښانېدل سخت وي، خو د رسمي شمېرو له مخې دغه هېواد کې د کورونا وېروس مثبتو پېښو شمېر اوس ۳۴ ته رسېدلی دی.
له ايټاليا او چين وروسته اسپانيا هم د هغو هېوادونو په نوملړ کې ده چې د کورونا وېرس په کې د ډېرو کسانو ژوند اخيستی دی. دې هېواد کې يوازې تېرو څلوروېشتو ساعتون کې ۳۹۴ کسان مړه شوي چې له دې سره د مړينو شمېر ۱۷۰۰ ته رسېدلی دی.
په پاکستان کې ۷۶۱ کسان پر کورونا وېروس اخته دي او شپږ کسان ترې مړه شوي دي، په دې هېواد کې د کورونا وېروس د مخنيوي په موخه رسټورانټون، بازارتونه او مارکېټنه تړل شوي دي.
کورونا وېروس د پاکستان ګاونډي هېواد ايران ډېر ځپلی دی، د رسمي شمېرو له مخې په دې هېواد کې تر دې مهاله ۱۶۸۵ کسان مړه شوي او نژدې ۲۲ زره کسان پرې اخته دي.
