تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د یونان د کډوالو یوه پنډغالي کې مرګونی اور
د رپوټونو له مخې د یونان د لیسبوس ټاپو په موریا پنډغالي کې اور لګېدلی چې تراوسه پکې د یوه کس وژل تایید شوي دي.
ځايي چاراکي وايي، د سوځېدلې ښځې مړی یې موندلی دی.
د یوه ماشوم د وژل کېدو رپوټونه هم شته، خو چارواکو تایید کړي نه دي.
ویل کېږي د کډوالو د استوګنې کانټینر کې اور لګېدلی دی.
دې پېښه پسې ځینې کډوالو لاریون کړی، چې د پولیسو غبرګون سره مخ شوي او د تیت پرک کولو لپاره یې اوښلن ګاز کارول شوی دی.
دغه کډوال وايي، اور وژونکي د پېښې ځای ته په ځنډ ورسېدل.
موریا پنډغالی درې زره کسان ځایولی شي، خو د افغانستان، ایران، سوریې او نورو هېوادونو تر ۱۲ زرو کډوال له سختو شرایطو سره د دغه پنډغالي کانتینرونو کې ژوند کوي.
دا پنډغالی له ۲۰۱۵ کال راهیسې کډوالو ته پرانیستل شوی.
لومړیو کې دا پنډغالی د هغو کسانو لپاره و چې غوښتل یې دلته څو ورځې تېرې کړي، خو ځینې له کلونو راهیسې دلته استوګن دی.
د یونان حکومت موریا پنډغالی اداره کوي او دلته د ډېر بیروبار لامل هم د اروپايي ټولنې د کنټرول سیاست بلل کېږي چې کډوال د یونان نورو سیمو ته د لېږد په ځای دغه ټاپو کې ساتل کېږي.
دا هم ترکیې ته د زرګونو کډوالو د ستنولو لپاره د ترکیې او اروپایي ټولنې ترمنځ د تړون برخه ده چې پر ۲۰۱۶ کال شوی دی.
