اندونېزیا زلزله کې د وژل شویو شمېر له ۱۳۰۰ کسانو اوښتی

اندونېزیا کې چارواکو ویلي، د جمعې ورځې په زلزلې او سمندري توپان کې د وژل شویو کسانو شمېر ۱۳۴۷ ته رسېدلی دی. له دې مخکې د بېړنیو مرستو ادارې ویلي وو، دغه پېښه کې ۸۴۴ کسان وژل شوي دی.

اووه اعشاریه پینځه درجې زورورې زلزله د جمعې پر ماښام د دغه هېواد مرکزي ټاپو سولواسي کې راغله او له هغه وروسته د ټاپو په پالو نومي ښار کې سمندري توپان (څونامي) مژګژوبله واړوله.

اندونیزیا کې زلزلې ۹۱ کسان ووژل او سلګونه ټپیان کړل

اندونیزیا کې اور غورځونکی غر چاودېدلی

رپوټونو کې ویل شوي، په سیمه کې د هغو خلکو شمېر په ډېرېدو دی، چې خوړو، اوبو او سون توکو ته سخت اړ دي.

داسې اندېښنې هم شته، چې ښايي یو شمېر ژوندي پاتې کسان لا هم د نیمه ورانو ویجاړو ودانیو تر خاورو، خځلو لاندې ایسار وي.

ډېر ژوندي پاتې کسان داسې حال کې لیدل کېږي، چې د کورنیو لپاره په خوړو او اوبو پسې ګرځي.

پالو ښار کې د سړکونو، اوبو، برېښنا او خوړو چمتو کولو شبکې او نژدې ټولې اسانتیاوې له منځه تللې، ښار ته غځېدلې لویې لارې ورانې شوې او د څښاک لپاره لږ پاکې اوبه موندل کېږي.

خبریالان وايي، ځايي پولیس د مرستو مرکزونو کې د اړو خلکو ګڼې ګوڼې کنټرولولو لپاره چیغې وهي او د اوښلن ګاز هوايي ډزې کوي.

د ښار ډېری عبادت ځایونو، روغتونونو او نورو عامه ودانیو ته هم زیان رسېدلي او د سره صلیب ځايي مسوولینو بي بي سي ته وویل، یوازې د یوې نړېدلې کلیسا له خاورو خځلو یې د ۳۴ زده کوونکو مړي راایستلي دي. دوی د ۸۶ زدکوونکو له ډلې دي، چې نور یې لا هم بې درکه دي.

دغه زلزلې د جمعې پر ماښام له ځايي مهال سره سم ۶ بجې او درې دقیقې د سولواسي ټاپو ځمکې په لس کیلومتره ژوروالي کې رامنځته شوه.

د اندونیزیا مرستیال ولسمشر جوزف کالا وايي، د مړو شمېر ښايي زرګونو کسانو ته ورسېږي.

بل لور ته د سره صلیب چارواکي وايي د دغې زلزلې او څونامي له کبله یو اعشاریه شپږ میلیونو کسانو ته د سر یا مال زیان اوښتی دی.