عمران خان د افغانستان په تړاو د پاکستان د پوځ نظر ولې خپل کړ؟
د عکس سرچینه، Getty Images
د هندۍ ورځپاڼې سټیټ مین په یوه مطلب کې د افغانستان روانې جګړې او په اړه یې د پاکستان د اوسني لومړي وزیر دریځ ته کتنه شوې ده.
د دې مطلب لیکوال وايي په دې اړه د پاکستان د لومړي وزیر عمران خان دریځ چې د وخت په تېریدو یې توپير کړی د پام وړ دی.
یو وخت ده طالبان هغه پښتانه بلل چې بهرنیانو پرضد جګړه کوي.
پر امریکا او د امریکايي ځواکونو د بې پیلوټه الوتکو پر بریدونو یې نیوکې کولې او هغه پاکستاني لیبرالیان یې د وینو تږي بلل چې د پاکستاني طالبانو پرضد یې د جګړې ننګه کوله.
خو لیکوال وايي اوس عمران خان د پاکستان پوځ ته ورته نظر لري، داسې چې غواړي طالبان د افغانستان په سیاسي ډګر کې ور ګډ شي.
د لیکوال په وینا دی دغه راز طالبانو ته د مشروعیت ور کولو سره خواخوږي لري او یا لږ تر لږه په دې اړه نرم دریځ لري.
عمران خان دغه راز پاکستان په افغانستان کې د امریکا د جګړې قرباني بولي.
سټیټ مین د یوه پخواني امریکايي چارواکي له قوله لیکي چې د امریکا ولسمشر ډونالډ ټرمپ باید د افغان جګړې د پای ته رسولو لپاره ډيپلوماټیکه لار غوره کړي.
دی دا مني چې امریکا د ډپلوماتیک حل خبره کوي خو دا ډول حل لار په خپله نه رامنځته کیږي پکار ده ډیپلوماټیکې هڅې هغومره تیزې شي لکه څومره چې د جګړې ډګر تود ساتل شوی.
روسیه ولې سوریه کې د افغانستان پر برخلیک اخته نه شوه؟
د عکس سرچینه، Reuters
روسۍ ورځپاڼې Komsomolskaya Pravda کمسمولسکیا پرافدا په خپله سرمقاله کې لیکلي سوریه د روسیې لپاره دویم افغانسستان نه وي.
ورځپاڼه لیکي کله چې روسیې په سوریه کې پوځي عملیات پیل کړل ډیرو فکر کاوه چې لکه د افغانستان په څېر به روسیه دلته هم ماتې خورې.
خو ورځپاڼه لیکي مسکو له افغان جګړې لوی عبرت او درس اخیستی او د سوریې په جګړه کې یې ډیره هڅه وکړه چې د افغان جګړې کیسه تکرار نه شي.
د ورځپاڼې په وینا روسیې لومړی دا هوښیاري وکړه چې په ځمکنیو عملیاتو کې ښکیله نه شوه او یوازې یې پوځي سلاکاران د سوریې پوځ په قطعاتو کې وګومارل او ډیره تکیه یې پر هوايي عملیاتو وکړه.
د ورځپاڼې د ادعا له مخې په سوریه کې په پوځي برخه کې ټولې لاسته راوړنې د روسي افسرانو له برکته دي چې د عملیات یې پلان او مشري یې وکړه.
د ورځپاڼې په وینا په تېرو درې کلونو کې روسیې د سوریې په جګړه کې ۱۰۱ سرتیري او افسران، اته جنګي الوتکې او اوه چورلکې له لاسه ورکړې.
خو د افغانستان په نږدې لس کلنه جګړه کې یې پنځلس زره سرتیري ووژل شول، ۱۱۸ الوتکې او څه باندې درې سوه چورلکې یې له لاسه ور کړې.
البیان:
اماراتۍ ورځپاڼې البیان لیکلي د دغه هېواد سپوږمکۍ چې (( خلیفه ساټ )) نومیږي یوه میاشت وروسته فضا ته توغول کیږي.
دا سپوږمکۍ د دغه هېواد د اوسني ولسمشر خلیفه بن زاید په نوم ده.
دا سپوږمکۍ چې د جوړولو چارې يې پنځه کاله وړاندې پيل شوې وې د محمد بن راشد د فضايي څېړنو په مرکز کې د اماراتي انجینرانو پرمټ جوړه شوې ده.
سپوږمکۍ به د البیان د رپوټ له مخې له ځمکې په نسبتا ټیټه فاصله یانې څه باندې شپږ سوه کیلومټره لرې په فضا کې خپل مدار ته داخلیږي.
دا سپوږمۍ د درې بعدي انځورونو په اخستلو کې ډیر مهارت لري د دې سپوږمکۍ انځورونه به د ځمکې د تودوخې په څارلو او د طبیعې پېښو پرمهال د ژغورنې په عملیاتو او داسې نورو چارو کې وکارول شي.
تمه ده خلیفه ساټ پنځه کاله په خپل مدار کې پاتې شي.
