پر ایران د فشار زیاتولو لپاره د امریکا ځانګړې کارډله

د امریکا د بهرنیو چارو وزیر مایک پمپیو په خبرغونډه کې وویل چې د ایران مسلو ته د رسېدو لپاره د ده په مشرۍ په دغه وزارت کې یوه ځانګړې کارډله جوړه شوې ده.

مایک پمپیو د پنجنشبې په ورځ دا هم وویل، چې د ایران چارو ته د رسېدو ځانګړی مسول براین هوک به د دې کارډلې مشر وي.

ښاغلي هوک له پېژند غونډې( د معرفۍ له مراسمو) وروسته وویل چې د ده او کارډلې ماموریت د ایران اړوند دولتي سیاست تعقیبول دي او هڅه به کوي چې د ایران "د ورانوونکي رژیم" چلن؛ لکه اټومي پروګرام، له ترهګرۍ ملاتړ او د سیمې بې ټیکاوولو سره مقابله وکړي.

* د امریکا هغه بندیزونه چې د ایران پر اقتصاد نېغ اغېز کوي

* ایران ولې پر سلګونو وارداتي توکو بندیز ولګاوه؟

برایان هوک د بهرنیو چارو وزارت خبر غونډه کې ټینګار وکړ:

"ایران باید خپل چلن بدل کړي، که خبرې غواړي، ولسمشر په ښکاره ورته تیاری ښودلی او موږ چمتو یو".

د ایران تېلي صادرات صفر ته ټیټول

برایان هوک زیاته کړه چې څو ورځې مخکې یې اروپا کې له خپلو سیالانو سره پر ایران خبرې وکړې او د دې کارډلې یو هدف هم پر ایران د لګېدلو بندیزونو پلي کېدل او په دې هکله د واشنګټن له ملګرو سره همغږي ده.

نوموړي چین ته د ایران د تېلي صادراتو په هکله ځواب کې وویل:

"زموږ موخه دا ده چې د راتلونکي نومبر تر څلورمې د ایران تېلی صادرات صفر ته ټیټ کړو".

* د ګرانۍ له امله ایران کې مظاهرې

* له افغانستانه ایران ته د ډالرو قاچاق

د نومبر پر څلورمه پر ایران د امریکا د بندیزونو دویم پړاو پیلېږي چې پکې د دغه هېواد د مالیې وزارت د تهران تېلي صادرات هم شامل کړي دي.

نوموړي د دې کارډلې اصلي موخه د ایران د چلن بدلولو لپاره له نړیوالې ټولنې سره همکاري وبلله.

۲۰۰۱ کال کې د عراق کارډله

یوه خبریال دا کار ډله پر ۲۰۰۱ کال "د عراق راتلونکی" په نوم ډلې سره ورته وبلله چې هغه مهال هم د امریکا بهرنیو چارو وزارت کې جوړه شوې وه، خو ښاغلي هوک د دې خبرې په ردولو سره وویل، چې د ایران کارډله "د عراق پروژې" سره ورته نه ده.

د عراق راتلونکی په نوم پروژه د ۲۰۰۱ کال اکتوبر کې او پر دغه هېواد د امریکا له یرغل او د صدام حسن د واکمنۍ له پرځولو دوه کاله مخکې د متحده ایالتونو بهرنیو چارو وزارت کې جوړه شوې وه.

دې کار ډلې به د امریکا له ملګرو او د عراق د حکومت له مخالفانو سره غونډې او ناستې کولې او له صدام حسین وروسته د عراق راتلونکي په هکله یې غور او فکر کاوه.

براین هوک

برایان هوک د امریکا د پخواني بهرنیو چارو وزیر رېکس ټېلرسن پر مهال دغه وزارت سره یو ځای او د سیاست جوړولو پروګرام مشر و.

ښاغلی هوک له دې دندې مخکې په ملګرو ملتونو کې د امریکا د پخواني سفیر جان بولټن سلاکار و.

نوموړی د ۲۰۱۲ کال ټاکنو کې د جمهوریپال نوماند مېټ رامني سلاکار هم پاتې شوی دی.