سعودي کې ښځو ته د موټروانۍ زدکړه

سعودي عربستان کې پر مېرمنو د موټروانۍ بندیز د جون پر ۲۴ پای ته رسېږي.

د دغه هېواد د تېلو حکومتي کمپنۍ ارامکو خپلو کارمنو( ښځینه کارمنانو) ته ګاډی چلول ور زده کوي.

د برتانیا د خبري اژانس رویټرز فوټګرافر احمد جدالله او خبریال رانیا الجمال د سعودي عربستان په زهران کې د ارامکو موټروانۍ مرکز ته تللي او دا یې لیدلي چې د دې کمپنۍ کارمنانې څنګه موټرواني زده کوي.

د موټروانۍ زده کولو لپاره ماریا الفراج- راتلونکي تصویر کې کیڼ لاسته ده- له روزونکې احلم الصومالي روزنه ترلاسه کوي.

له موټروانۍ زدکولو سره هغه دا هم زده کوي چې د موټر تېل او ټایرونه څنګه بدل کړي او تر ټولو مهمه دا چې پټاره( سېټ بېلټ) څنګه وتړي.

سعودۍ مېرمنې د موټروانۍ اجازه تر لاسه کول د ځان لپاره ډېر مهم بولي.

ودانګره یا مهندسه عمیرا عبدالغدر-راتلونکی انځور- وايي، د جون پر ۲۴ به ګاډی خپله چلوي او خپلې مور ته به چکر ور کوي.

عمیرا زیاتوي، شټرینګ ته کېناستل دا مانا لري چې ته په خپل واک کې یې:

"زه به دا پرېکړه کوم، چې کله لاړه شم، څه وکړم او کله ستنه شم".

هغه زیاتوي: "موږ ته ورځني کار کې ګاډي پکارېږي. موږ کار کوو، موږ میندې یو، موږ ملګري لرو، موږ بهر ته ځو او د دې لپاره ګاډو ته اړتیا لرو، زموږ ژوند بدلېږي".

ارامکو کې ۶۶ زره کسان کار کوي چې پنځه سلنه یې ښځې دي.

انځورونه د احمد جدالله دي.