تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د نهنګ له خېټې ۸۰ پلاستیکي کڅوړې اېستل شوې
هغه ستر کب یا نهنګ چې د تایلېنډ په سوېلي څنډو کې مړ شوی اتیا پلاستيکي کڅوړې يې ګېډه کې موندل شوې دي.
چاپېریال کارپوهانو د دې نهنګ د ژوند وروستیو ګړیو کې تر وروستۍ شېبې هڅه وکړه چې له ګېډې یې پلاستیکونه راوباسي او ویې ژغوري، خو یوازې د پنځو کڅوړو په ایستلو بريالي شول.
د سمندري ژوند یو کارپوه وايي، دغه کب اتیا کیلوګرامه پلاستیک خوړلی و او په دې دلیل یې نور خوراک نشو کولی.
دا نهنګ تېره دوشنبه د تایلېنډ سمندرغاړه کې په داسې حال وموندل شو چې خوځېدلی نه شو.
د ژواک چاپېریال ملاتړو هڅه وکړه په کښتوړۍ سره دا نهنګ په لامبو را ولي.
هغوی څو ورځې له نهنګ سره تېرې کړې، خو بالاخره د جمعې په ورځ مړ شو.
کارپوهان اټکلوي که د پلاستيکي کڅوړو کارول او د هغو د بیا کارېدنې نشتوالی همداسې دوام کوي په راتلونکې لسیزه کې به په سمندرونو کې د پلاستيک اندازه درې برابره شي.
سووېل ختیځه اسیا کې تایلېنډ یو هغه هېواد دی چې پلاستیکې کڅوړې پکې ډېرې کارېږي.
اټکل کېږي چې هر کال په دغه سیمه کې د پلاستیکي کڅوړو د خوراک له امله په سلګونو ډوله سمندري ژوي مړه کېږي.
