تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د جاپاني امپراتور لیرې کېدو وخت ټاکل شوی
د ۲۰۱۹ کال اپرېل میاشت کې د ۸۳ کلن جاپاني امپراتور تنو اکیهیتتو د رسمي لیرې کولو وخت ټاکل شوی دی.
د جاپان لومړي وزیر شینزو ابې له یوې دولتي او سلطنتي غونډې وروسته د امپراتور د لیرې کولو لپاره د وخت ټاکلو په اړه بحث وکړ، چې بالاخره د لیرې کېدو نېټه یې د ۲۰۱۹ کالد اپرېل میاشتې ۳۰مه وټاکل شوه.
تېر کال د جاپان امپراتور ویلي وو، د ډېر عمر او ناروغۍ یې دنده ګرانه کړې ده.
دا په تېرو دوو پېړیو کې جاپان کې لومړی ځل دی چې د امپراتور د ګوښه کولو پرېکړه کېږي، چې د خلکو منځ کې یې تاوده بحثونه هم رامنځ ته کړي دي.
د هغه زوی شهزاده نروهیتو به د ۲۰۱۹ کال مې میاشت کې د خپل پلار ځای ناستی شي.
په جاپان کې امپراتور هېڅ سیاسي واک نه لري او دنده یې په بشپړه توګه تشریفاتي بڼه لري. یوازې لومړي وزیر ته لوړه ورکول، د نویو قوانینو اعلانول او د بهرنیو حکومتي چارواکو هرکلی د امپراتور له دندو دي. د جاپان د پاچا مقام مذهب پر شینتو مذهب پورې تړلی او امپراتور لاهم مذهبي مراسم ترسره کوي.
د یوې نظرپوښتنې له مخې، د جاپان ډېری خلک د امپراتور د لیرې کېدو پلویان دي او وايي په هېواد کې باید د امپراتور لیرې کېدل قانوني بڼه ولري.
په وروستیو کې د امپراتور د ګوښه کولو پلویان ډېر شوي او د جاپان دولت په روان کال کې یوه داسې طرحه تصویب کړه چې امپراتور یې پربنسټ لیرې کېدای شي.
خو دا طرحه یوازې دا ځل دا واک لري چې امپراتور ګوښه کړي او د هغه زوی یې ځای ناستی شي.
د جاپان امپراتور چې د زړه عملیات یې هم کړي، ډېر ځلې د پروستات سرطان د درملنې لپاره بستري شوی.
په ۱۹۸۹ کال تنو اکیهیتتو د خپل پلار هیروشیو تر مړینې وروسته د امپراتور پر څوکۍ کښېناست.
