پنځه میاشتې وروسته سمندر کې ورکې ښځې موندل شوې

امریکايي سمندري پوځ دوې ښځې په سمندر کې له لارې ورکولو پنځه میاشتې وروسته ژوندۍ موندلې دي. جنېفر اپل او تاشا فیوابا له هوايي نه په یوه کوچنۍ بادي کښتۍ کې تهایتي ته روانې وې، چې د کښتۍ ماشین یې د ناوړه موسم له کبله خراب شو.

وروسته دغې کښتۍ د جاپان سویل ختیځ کې ۱۵۰۰ کیلومتره لرې ووته. دوی او ورسره دوه سپي یې د کب نیونکو لخوا امریکايي چارواکو ته د خبر له ورکول کېدو وروسته وژغورل شول.

د امریکايي سمندري پوځ په وینا دغه ښځې په مې کې په سفر وتلې وې او فکر یې کاوه، چې وچې ته به د بادونو او بادبان په مرسته ورسېږي، خو کله چې له ټاکلې مودې وروسته دوی و نه توانېدې وچې ته ورسېږي، له اندېښنې د ډکو پیغامونو استول یې پیل کړل.

د سمندري پوځ چارواکي وايي، دوی هره ورځ دغه پیغامونه استول، خو شاوخوا کې نه بله کښتۍ وه او نه هم د کښتیو کوم تم ځای. خو د اکتوبر پر ۲۴ مه د یوې تایوانۍ کښتۍ کب نیونکو سپرو دغه کښتۍ ولیده، چې سمندر کې تمبیده او ګوام کې یې د امریکايي اډې مسوولینو ته خبر ورکړ.

پر بله ورځ په سمندر کې د امریکا یو ایس ایس اشلنډ نومې بېړۍ د دغو ښځو او د دوی د سپیو ژغورلو ته ورسېده، چې اصلاً د هنولولو اوسېدونکې دي. مېرمن اپل وايي:

''دوی 'امریکايي سمندري پوځ ' موږ له مرګه وژغورلو، کله مو چې د سمندر پر سطح د دوی کښتۍ ولیده، موږ له ډېرې خوښۍ جامو کې نه ځایدو ''

دغه څلور ژوندي سري اوږده موده ځکه ژوندي پاتې شوي، چې ویل کېږي، د اوبو تصفیې ماشین یې درلود او د پاستې او وچې شوربې په څېر وچو خوړو پریمانه زېرمه یې درلوده.