تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
''ګلناره کریمووا توقیف کې ده''
د ازبکستان چارواکو تایید کړې، چې د دغه هېواد د پخواني ولسمشر اسلام کریموف لور ګلناره کریموا د ۲۰۱۵ کال د فساد یوې قضیې کې له نیول کېدو وروسته توقیف کې ده.
د ۴۵ کلنې کریمووا په اړه داسې فکر کېده، چې د خپل پلار ځای به ونیسي.
د ازبکستان د لویې څارنوالۍ له لوري ویل شوي (د هغې پر ازادۍ د بندیز یو امر دوه کاله مخکې صادر شوی دی).داسې ګومان کېږي، چې هغه په کور کې نظر بنده ده، خو د اوسېدو ځای یې معلوم نه دی.
ګلناره یو مهال په هسپانیا کې د خپل هېواد سفیره وه. د فېش، ګاڼو کاروبار او موسیقۍ ویډیوګانو ثبتولو له کبله یې وروسته نړیوال شهرت وموند.
خو وروسته د بډو رشوتونو او تورو پېسو سپینولو قضیه کې ښکېله شوه. اوس د لویې څارنوالۍ په اعلامیه کې نوموړې د فسادو دوو قضیو کې ښکېله بلل شوې، چې ارزښت یې نژدې یو میلیارد ډالرو ته رسېږي.
دغه پېسې د برتانیا، روسیې، مالټا او عربي اماراتو په ګډون ۱۲ هېوادونو کې لګول شوې دي. اعلامیه کې ویل شوي په یوه قضیه کې نوموړې تورنه پېژندله شوې، چې له کبله یې پرې د ازادۍ بندیز لګول شوی دی او بله قضیه یې لا هم تر څېړنې لاندې ده.
په اعلامیه کې دغه راز راغلي، چې چارواکي د هغې د شتمنۍ پر کنګلولو غور کوي.
کشر اسلام کریموف، چې لندن کې اوسي له چارواکو غوښتي، چې د هغې ځای ځایګي په تړاو معلومات عام کړي، خو د تفصیل په اړه یې څه نه دي ویلي.
