له سکاټلنده روسیې ته سفر د رشوت بیه' هرکلی او دوه سګرېټ'

څومره وخت کې څوک له سکاټلنډه روسیې ته ګاډي کې رسېدای شي؟

عکاس جېمز پارکر خپله کمره واخیسته او دغې پوښتنې ته د ځواب موندلو لپاره خپل کلاسیک مورس ماینر ګاډي ته وخوت. نوموړی له ۱۰ زره میله سفر وروسته داسې حال کې روسیې ته ورسېد، چې د لارې اوږدو کې یې بسپنه هم کوله.

جېمز د لارې اوږدو کې له ۱۹ هېوادونو، درېیو دښتو او دوو سیندونو تېر شو او ۵۳ مه ورځ خپل منزل ته ورسېد.

د سفر اوږدو کې ډېر پام نارینه وو ته و. هغه غوښتل وپوهېږي، چې له لوېدیځه د ختیځ پر لور سفر کې جنسیتي توپیر څه ډول بدلېږي.

نوموړی وايي، د سفر پر مهال مې داسې احساس کاوه، چې د هغو خلکو، هغو شیانو او هغه حالت عکسونه اخلم، چې د خپل ځان او شتون احساس کوم.

له همدې کبله د جېمز ډېری انځورونه د ځوانانو اړوند دي. هغه له ځوانانو سره دوستي کړې او د دغې دوستۍ اصلي لامل د هغوی بایسکلونه او ګاډي وو. 'بایسکل داسې نړیوال شی دی، چې د کاروولو لپاره یې د بلې ژبې زده کړې ته اړتیا نه شته. '

جېمز د خپل ګاډي له کبله هم ډېره ګټه کړې.

زه به چې کله هم د دمې لپاره کښېناستم. یو څوک به سملاسي راپیدا شو او کافي به یې راوړه. لس مستریان به راټول شول. د ګاډي بونټ به یې پرانیست او هلته به داسې ښکارېده، چې موږ د ' فارمولا ون ' ګاراج کې ناست یو، خو له خېټورو سړیو سره... '

جېمز په دغه سفر کې ډېر خواږه یادونه لري، خو وايي ژر وپوهېد، چې د ورځې لس ساعته ګاډی ځغلول اسان کار نه دی.

یوه بله ستونزه دا وه، چې په شاړو سیمو کې څنګه خواړه او د ګاډي لپاره تېل ومومي. پولیسو یې هم کله نا کله مخه نیولې، خو وايي لږ تر لږه رشوت مې چې ورکړی، دوه سګریټ او د ستړي مه شي لپاره لاس ورکول وو.

خو دې ټولو ستړیو، ستونزو سره هم جیمز وايي، ګوبي نومې سارا کې شپه تېرول، استانبول کې د حکومت پر ضد د پوځیانو کودتا پر شپه لاره ورکول او کاپاډیوچیا کې ګهیځ وختي غونډوسکي سفر کول یې نه هېرېدونکي دي.

*ټول عکسونه جېمز پارکر اخیستي دي.