تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
"نوازشریف باید استعفا ورکړي"
- Author, خدای نور ناصر
- دنده, بي بي سي، اسلام اباد
د پاکستان تحریک انصاف ګوند مشر عمران خان او د پيپلز ګوند مشر اصف زرداري دواړو د پاکستان له لومړي وزیره غوښتنه کړې، چې باید اخلاقاً له خپلې دندې ګوښه شي.
د پنجشنبې پر ورځ د پاکستان د سترې محکمې یوه کمېسيون د دغه هیواد د لومړي وزیر نوازشریف، د هغه د دوو زامنو او لور پر ضد د 'پاناما ' په تړاو قضيه کې امر وکړ، چې پر ښاغلي شریف د دغو تورونو د سپيناوي لپاره دي څېړنډله جوړه شي او په ۶۰ ورځو کې دي بشپړ راپور خپور کړي.
د یاد کمېسيون تردغې پرېکړې وروسته که څه هم د لومړي وزیر نوازشریف پلویانو خوښۍ لمانځلې او د بري ادعا يې کړې، خو د اپوزیسيون سیاستوالو بیا له ښاغلي شریف څخه د ګوښه کېدو غوښتنه کړې. ځکه چې وايي، د کمیسيون پرېکړه د هغه پر ضد ده.
د پاکستان پخواني ولسمشر او د پيپلز ګوند مشر اصف زرداري په يوه خبري غونډه کې د سترې محکمې دغه پرېکړه غندلې او وايي، لومړی وزیر نوازشریف باید له دندې ګوښه شي.
ښاغلي زرداري وویل، له تېر یوه کال راهیسې د یاد کمېسيون په نامه پر پاکستاني قام ریشخند وهل شوی او د کميسيون دغه پرېکړه يې وغندله. خو په خپلو خبرو کې يې هغو دوو قاضيانو ته سلام وړاندې کړ، چې د لومړي وزیر نوازشریف ضد يې نوټ ليکلي و.
پاکستان کې د اپوزیسيون دویم مهم سیاستوال او د پاکستان د تحریک انصاف ګوند مشر عمران خان که څه هم د سترې محکمې د دغې پرېکړې تود هرکلی کړی او دا يې د ښاغلي شریف ضد بللې، خو د ښاغلي زرداري په څېر يې له ښاغلي شریف څخه د استعفا ورکولو غوښتنه کړې.
"ددغې قضيې پنځو واړو قاضيانو نن په خپله پرېکړه کې د نوازشریف ټولې خبرې رد کړې. مطلب هر څه يې دروغ وګڼل، ځکه زه نن د پاکستان د ټول قام لخوا نوازشریف ته وایم، چې هغه د استعفا ورکړي. ''
د پاکستان د سترې محکمې تردغې پرېکړې وروسته واکمن مسلم لیګ (ن) ګوند او د اپوزیسيون عمران خان ګوند دواړه خواوې خواږه وېشي او د خوشاليو څرګندونې کوي.
د ځينو په اند دغې پرېکړې ته د نوازشریف ګوند وارخطا و، چې هسې نه د دوی ضد پرېکړه وکړي او ښاغلی شریف ګوښه کړي.
بلې خواته د عمران خان پلویان بیا په دې نظر وو، چې ښاغلی شریف به په هر صورت له دندې ګوښه کوي.
د کمېسيون پرېکړې که زړونو کې دواړه خواوې خواشینې کړې هم وي، خو په ظاهره دواړو خواوو د خوشۍ څرګندونې کړې او دواړو لوریو د بري ادعا کړې.
د عمران خان په مشرۍ د اپوزیسيون ځينو سیاستوالو د لومړي وزیر پر ضد لاریونونه کړي
د ویلو وړ ده چې د پاناما له ډاګیزه شويو اسنادو څخه ځيني داسې اسناد څرګند شوي وو، چې په کې د پاکستان د لومړي وزیر نوازشریف پر دوو زامنو حسن نواز، حسین نواز او لور مریم نواز تور پورې شوی و، چې په بهر کې يې خپلې شتمنۍ پټې کړې.
تر هغه وروسته د عمران خان په مشرۍ د اپوزیسيون ځينو سیاستوالو د ښاغلي شریف ضد احتجاجونه پېل کړل او ښاغلی شریف يې دې ته اړ کړ، چې د دغې قضيې د څېړلو لپاره يې د یوه پنځه کسیزه کمېسيون جوړولو اعلان وکړ. یاد کمېسيون په شاوخوا پنځنیمو میاشتو کې دغه قضيه څېړلې او ننۍ پرېکړه يې اعلان کړه.
