بیت المقدس کې یوې لارۍ اسرايیلي سرتېري لاندې کړي
د عکس سرچینه، AFP
بیت المقدس کې د یوې لارۍ چلوونکي موټر پر یوه ډله اسراييلي سرتېرو وروستلی چې څلور کسان یې وژلي. پولیس پېښه ترهګریز برید بولي.
د روغتیاپالو په وینا په دې برید کې درې ښځې او یو سړی چې ټولو تر شلو کلونو لوړ عمرونه درلودل، وژل شوي او لږ تر لږه ۱۳ نور ټپیان دي.
په وژل شویو کې ۳ ښځې او یو سړی دی.
پولیس وايي لارۍ چلوونکی د اسراییلي سرتېرو له خوا په ډزو وژل شوی.
د عکس سرچینه، Reuters
په تېرو ۱۵ میاشتو کې څو ځلې فلسطینیانو پر اسراییلي سرتېرو بریدونه کړي چې له چړې، ټوپک او موټر یې پکې کار اخیستی دی.
د بس موټر یوه چلوونکي چې پېښه په خپلو سترګو لیدلې اسراییلي راډیو ته وویل، موټر چلوونکي لارۍ پر سرتېرو وروستله او وروسته بیا په شا راغی.
رپوټونه وايي چې لارۍ چلوونکی د ختیځ بیت المقدس له عرب مېشتو سیمو دی.
عکسونو کې لیدل کېږي چې د لارۍ د مخې هنداره په مرمیو لګېدلې.
د عکس سرچینه، AFP
فلسطینۍ حماس ډلې د برید ستاینه کړې ده او د دغې ډلې ویاند عبدالطیف قانو پر فلسطینیانو غږ کړی چې "مقاومت وکړي ".
تر دې وروستي برید وړاندې، د ۲۰۱۵ کال له اکتوبر راهیسې ۳۵ اسراییلیان د فلسطینیانو او یا هم عربو اسراییلیانو له خوا په چړې، ټوپک او موټر وژل شوي.
اسراییل وايي دوی هم په همدې موده کې تر ۲۰۰ ډېر فلسطینیان چې ډېری یې برید کوونکي ول وژلي.
د عکس سرچینه، Reuters
