وټس اپ د عکس او وېډیو ړنګولو لپاره 'یوځل ووینه' ځانګړنه اضافه کوي

وټس اپ د یوې نوې ځانګړنې اضافه کولو په درشل کې دی چې یو عکس او وېډیو به تر یو ځل کتلو وروسته د ګرځنده ټیلیفونونو له وټس اپ کاریال (اپلیکېشن) ړنګېږي.

وروسته تر هغه چې ترلاسه کوونکی لومړی ځل انځور پرانیځي د "یوځل ووینئ" غوراوی به پرته له دې چې په ټیلیفون کې وساتل شي، انځور یا وېډیو په خپل سر پاکه شي.

وټس اپ ویلي، دا ځانګړتیا د "کارنو د خصوصي حریم د غوراوي لا ډېرې ساتنې" په پار زیاتوي.

په ورته وخت کې د ماشومانو د خوندیتابه مدافعانو اندېښنه ښودلې چې ښايي د وټس اپ دا نوې ځانګړنه به له ماشومانو د ناوړه ګټې اخیستو کې همکاري وکړي.

له ماشومانو سره د بېرحمانه چلن د مخنیوي ملي انجمن (اېن اېس پي سي سي) هم له فیسبوک سره - چې وټس اپ یې یوه برخه ده- له پټ نوم لرونکو پیغامونو د ګټې اخیستو پر سر اختلاف لري.

پیغامونو ته رمز یا پټ نوم ورکول د دې لامل ګرځي چې پولیس یې ونه شي څارلی. خو د پیغام پخپله ډیلیټېدل د دې لامل کېږي چې ان پولیس د ټیلیفونونو د ضبطولو پرمهال هم د ګټې وړ شواهد نه شي ترلاسه کولی.

د دې خیریه بنسټ یو جګپوړی مشر الیسن ترو د انلاین خوندیتابه چارو په اړه وايي: " د یوځل لیدلو غوراوی ماشومان له خطر سره مخامخوي".

وټس اپ وايي د دې ځانګړنې اضافه کول عادي کارنو ته د خصوصي حریم د ساتلو شونتیا برابروي او د شخصي انځورونو لرې کولو کې ګټه ترې اخیستل کېدای شي، لکه یو تېرنویی (پاسورډ) چې یو بل چا ته استول کېږي.

دا شرکت زیاتوي: "اړینه نه ده چې هره منځپانګه دې شریکه کړل شي".

د دغه شرکت په وینا، له همدې اونۍ به کارنو د دې ځانګړنې وړاندې کول پیلېږي.

په ورته وخت کې کارن د وټس اپ پرانیستلو پرمهال سکرین شاټ اخیستی یا د سکرین وېډیو ثبتولی شي.

نورې ځانګړنې:

په تېره نومبر کې وټس اپ یوه بله اسانتیا راوستې وه چې تر استول کېدو اوه ورځې وروسته به پیغامونه د استوونکي او ترلاسه کوونکي لپاره نه ښکاري.