تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
'انټرنټ اکسپلورر' راتلونکی کال خپلو کاروونکو سره خدای پاماني کوي
مایکروسافټ تکنالوژۍ شرکت اعلان کړی دی چې خپل یو تر ټولو مشهور او ډېر کارېدونکی پروګرام، انټرنټ اکسپلورر' به د راتلونکي ۲۰۲۲ کال له جون وروسته بندوي.
انټرنټ اکسپلورر د نړۍ یو تر ټولو مشهور براوزر دی او ۲۶ کاله وړاندې له 'وېنډوز ۹۵' سره یو ځای د انټرنټ نړۍ ته راغلی و.
خو مایکروسافټ اعلان کړی چې دا پروګرام به له راتلونکي کاله د 'وېنډوز لس' برخه نه وي.
یاد شرکت له تېرو څو کلونو راهیسې د دې پروګرام د تړلو نیت درلود، خو په ۲۰۱۹ کال کې اړ شو چې د امنیتي دلایلو له کبله یې د لنډې مودې لپاره فعال پرېږدي.
هغه مهال د اندازې له مخې ۸ سلنه خلکو لا هم 'انټرنټ اکسپلورر' کارولو.
د دې پروګرام بدیل یا ځایناستی 'مایکروسافټ اېج' نومېږي، چې د براوزنګ یا وېبپاڼو پرانیستلو او کتلو اسانتیا به هم ولري.
ډېر چټک، ډېر خوندي بدیل
ځینې پخوانۍ وېبپانې او پروګرامونه د انټرنټ پخوانۍ تکنالوژۍ پر بنسټ جوړ شوي وو، او نویو براوزرونو کې یې پرانیستلو جنجال کاوه.
اوس د 'مایکروسافټ اېج' چمتو کوونکي وایي، دا نوی پروګرام تر پخواني 'انټرنټ اکسپلورر' چټک او ډېر خوندي دی، او د براوزنګ نوې بڼه وړاندې کوي.
له ۲۰۰۰ کاله نیولې بیا تر ۲۰۰۵ کاله پورې نړۍ کې ۹۰ سلنه انټرنټ کاروونکو 'انټرنټ اکسپلورر' کارولو.
خو په ۲۰۱۳ کال کې د مایکروسافټ شرکت له دې کبله ۵۶۱ میلیونه ډالره جریمه شو چې خپل وېنډوز پراګرام کې یې نوی او بهتره براوزر نه و شامل کړی.
یاده دې وي چې دا مهال 'ګوګل کروم' په نړۍ کې تر ټولو ډېر کارېدونکی براوزر دی.
د مایکروسافټ نوی فونټ
مایکروسافټ شرکت همدا راز اعلان کړی چې د خپل اوسني فونټ یا لیکدود بدلولو په اړه فکر کوي.
یاد شرکت له ۲۰۰۷ کال راهیسې خپلو ټولو پروګرامونو کې د 'کلېبري' فونټ کاروي.
خو اوس مایکروسافټ خپلو کاروونکو ته پنځه فونټونه یا لیکدودونه د غوراوي لپاره وړاندې کړي، او هر یو چې ډېر مینه وال ولري، هغه به د دې شرکت په راتلونکو پروګرامونو کې کارول کېږي.
