خیبر پښتونخوا کې له جمعې راهیسې د ډاکټرانو کاربندیز

د پېښور په ګډون د خیبرپښتونخوا ایالت په ټولو سیمو کې د تېري جمعې له ورځې راهیسې د ډاکټرانو کاربندیز لاهم روان دی او له پرونه راهیسې ګڼو ډاکټرانو په شخصي روغتونونو کې هم د کاربندیز اعلان کړی دی.

په دغه ایالت کې احتجاج کوونکي ډاکټران غوښتنه کوي چې د جمعې ورځې په اخ و ډب کې د دوی نیول شوي ملګري ډاکټران دې خوشي شي او هغه قانون چې په دې وروستیو کې د خیبرپښتونخوا ایالتي اسمبلۍ تصویب کړی، بېرته لرې کړل شي.

پېښور: د ټولو روغتونونو ډاکټرانو ولې اعتصاب کړی؟

''خیبر پښتونخوا کې ځینې ډاکټران هم د پولیو واکسین مخالفت کوي''

د خیبرپښتونخوا ایالتي حکومت د صحت په څانګه کې د اصلاحاتو په نامه یو نوی قانون راوستی، چې ډاکټران يې مخالف دي.

په پېښور کې د ډاکټرانو د ټولنې مشر ډاکټر سراج الاسلام له بي بي سي سره خبرو کې ایالتي حکومت ګوډاګی حکومت وباله او په خبره يې د اصلاحاتو په نامه دولتي روغتونونه د دولت له کنټروله باسي.

د ډاکټرانو د ټولنې په خبره دوی لاهم په روغتونو کې د عاجلو ناروغانو درملنه کوي، خو د دوی په خبره که ایالتي حکومت د دوی غوښتنې ژر ونه منلې، نو لېرې نه ده چې په روغتونونو کې به د عاجلو ناروغانو له درملنې هم لاس واخلي.

بل پلو د خیبرپښتونخوا ایالت د اطلاعاتو وزیر شوکت یوسفزی وايي، احتجاج کوونکي ډاکټران لږ دي او دوی به يې کله هم غوښتنې و نه مني، ځکه چې د ده په خبره دوی له همدې احتجاجه ناوړه ګټه اخلي.

په خیبرپښتونخوا ایالت کې تېره دوره کې هم د اوسني واکمن تحریک انصاف ګوند حکومت و او په ۲۰۱۵م میلادي کال کې يې په روغتیايي څانګه کې د اصلاحاتو په نامه یو قانون تصویب کړی و.

اوس د دغه ایالت ډاکټران پخوانی او اوسنی دواړه قانونه د دولتي روغتونونو د دولت له کنټروله ایستل یادوي او وايي، تر هغه چې دغه دواړه قانونه يې بېرته اخیستي نه وي، د دوی احتجاج به دوام ولري.