تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
بلوچستان: د اماراتو شاهي کورنۍ پر ښکاریانو وسلوال برید شوی
د بلوچستان ایالت په پنجګور ولسوالۍ کې د متحده عربي اماراتو د شاهي کورنۍ د ښکاري غړو په لېږدوونکي کاروان وسلوال برید شوی دی.
په پېښه کې یو موټر زیانمن شوی دی.
په کوټه کې د ملېشه ځواکونو ویاند خان واسع بي بي سي ته وویل، چې دا پېښه د پنجګور په کچک سیمه کې د سې شنبې په شپه شوې ده.
د چارواکو په خبره، دغه شاهزادګان د بلوچستان په مختلفو سیمو کې د کمیاب څاړي مرغه ښکارولو ته ورغلي دي.
واسع خان وايي، له ۳۰ تر ۳۵ موټرو کاروان روان و، چې برید پر وشو.
' په ډزو کې یو موټر لږ زیانمن شوی، د کاروان ساتو ملېشه ځواکونو د ځوابي ډزو له امله بریدګر تښتېدلي دي'.
امنیتي ځواکونو سیمه کلابند کړې، خو تر اوسه یې د پېښې په تړاو څوک نه دي نیولي.
پنجګور له ګوادر بندر ۴۰۰ کیلومتره واټن لري.
له بلې خوا تحریک انصاف د بلوچستان په کچي او کوټه کې د عرب شاهي کورنۍ په ضد مظاهرې کړې دي.
عرب شازیانو د دغه ایالت مختلفې سیمې د څاړي د ښکار لپاره په نښه کړې دي.
له دې مخکې د شاهي کورنۍ غړو د پنجاب په بکر ولسوالۍ کې هم د ښکار هڅه وکړه، خو ځايي کرونګرو یې پر ضد اعتراض وکړ.
کرونګرو ویل، چې د ښکار پر مهال د دوی کروندې زیانمنېږي.
د پاکستان مرکزي چارواکو د پښتونخوا له حکومت غوښتي و، چې د عرب شاهي کورنۍ د غړو لپاره د څاړي د ښکار بندیز د لنډ مهال لپاره لرې کړي، خو پېښور یې دا غوښتنه رد کړه.
