تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
په کوټه کې وير او کاربنديز
- Author, خدای نور ناصر
- دنده, بي بي سي، اسلام اباد
د بلوچستان په مرکز کوټه کې تر ډله ييزو ځانمرګو بریدونو وروسته نن چهارشنبه (۲۶ اکټوبر) کاربندیز دی.
د دغه ښار د سوداګرو اتحاديې په ټول ښار کې د تجارتي مارکېټونو او پلورنځایونو د احتجاج په توګه د تړلو اعلان کړی دی.
د دوشنبې او سه شنبې په منځنۍ شپه په کوټه کې دریو ځانمرګو بریدګرو د پولیسو پر یوه رونیز مرکز ډله ييز برید وکړ، چې په کې ۶۱ تنه وژل شوي او تر یو ۱۲۰ ډېر نور ټپیان شوي وو.
د بلوچستان د سوداګرو اتحاديې یوه مشر الله داد ترین له بي بي سي سره په خبرو کې وویل، دوی دغه برید په سختو ټکیو کې "غندي او د دې پرضد به هم نن چهارشنبه د کوټې ښار ټول تجارتي مارکېټونه د احتجاج په توګه بند وساتي."
له دې سره د دغه ښار سوداګرو د چهارشنبې په غرمه د کوټې په باچاخان څلورلارې یو لاریون هم وکړ او د وسله والو پر ضد يې شعارونه ورکړل.
په دغه لاریون کې د سوداګرو مشرانو پر حکومتي اورګانونو هم سختې نیوکې وکړې او پوښتنه يې وکړه، چې تر کومه دوی د همداسې ترهګرو بریدونو شاهدان وي.
بلې خواته د بلوچستان ایالتي حکومت هم د دغه برید پرضد درې ورځنی ماتم اعلان کړی دی.
که څه هم د بلوچستان ایالت شاوخوا ټولو سیاسي ګوندونو د دغه برید غندنه کړې او له حکومتي اورګانونو يې غوښتي، چې د هرډول وسله والو پر ضد دې جدي ګامونه پورته کړل شي.
پر خواله رسنیو هم ګڼو فعالانو د پاکستان پر حکومت او امنيتي اورګانونو سختې نیوکې کړې دي.
له دې سره پر خواله رسنیو هغه عکسونو هم ډېر خپاره شوي، چې په کې د وژل شويو پولیسو سرتېرو مړي د امبولانسونو پر ځای د لارې په وېګنانو کې پر چتونو وړل کېږي.
د کوټې د دغه برید پړه دوو بېلابېلو وسله والو ډلو منلې، چې یوه يې هم داعش او بله يې له پاکستاني طالبانو يوه بېله شوې ډله ده.
