د ښاغلي مسعود د ډلې جنگي فعاليتونه ډېرى افغان پولې ته څېرمه د جنوبي وزيرستان په قبايلي سيمو کې وو.

د جيو سيمه ييز تلوېزيون ويلي چې ' د پاکستان د طالبانو د تحريک' مشر بيت الله مسعود تېره شپه مړ شوى، خو پاکستاني چارواکي او پاکستاني اورپکو سرچينې ټينگار کوي چې دى ژوندى دى .

د پاکستان په سوات دره کې د پاکستاني طالبانو يوۀ تن وياند مسلم خان ويلي چې : '' زه د بيت الله مسعود
له يوۀ نژدې ملگري سره وغږېدم، چې ويل يې ده لا تراوسه د خپل مشر د مړينې خبر نه دى اورېدلى. ''

مسلم خان واييچې زياتره د پاکستان حکومت دا ډول بابېزه اوازې خپروي .

پر مشر بيت الله مسعود د پاکستان د پخوانۍ لومړۍ وزيرې بېنظير بوټو د وژلو تورونه هم وو، چې د تېر کال په ديسمبر مياشت کې په راولپنډۍ کې ووژل شوه .
خو د بېنظير بوټو وژل کېدل د دغې ډلې له خوا په مکرر ډول ردکړاى شوي دي .

د پاکستان يوه لوړ رتبه امنيتي چارواکي ويلي چې : '' بيت الله مسعود ناروغه دى، او روغتيايي حالت يې د اندېښنې وړ دى . ''

پاکستاني چارواکو د مسعود د دويم خسر له خولې ويلي چې بيت الله مسعود د کوما په حالت کې دى، او پاکستاني طالبانو د مشر يوۀ نژدې ملگري هم دا منلې چې مسعود ناروغه دى، خو د مړينې يې څه نه دي ويلي .

د پاکستاني طالبانو يوه قومندان رحيم بکري رسنيو ته ويلي چې ښاغلى مسعود د شکر له ناروغۍ نه کړېږي او اوسمهال تر درملنې لاندې دي، خو ډېر ژر به روغتيا ومومي .

د پاکستاني طالبانو يوۀ بل وياند مولوي عمر هم ويلي چې : '' زموږ مشر روغ رمټ دى . هېڅ د اندېښنې وړ ناروغي نه لري . ''

يوه بل قومندان رزاق بيا ويلي چې په اوونۍ کې د مسعود دوه يا درې ځله درملنه کېږي او ډېر کمزورى شوى دى .

د پاکستان د 'نيوز ډيلي' ورځپاڼې د روانې اوونۍ په لومړيو کې رپوټ ورکړى و، چې ښاغلى مسعود د ورپېښې ناروغۍ له امله له درو اوونيو راهيسته په ځاى کې پروت او د خوځېدو نه دى .

د رپوټونو په وينا، ښاغلي مسعود په دې وروستيو کې واده کړى و، او لکه د نورو پاکستاني طالب مشرانو په څېر يې له عکس او يا وېډيو اخيستلو تل ډډه کوله .

د پاکستاني طالبانو د تحريک مشر يو بل نژدې ملگرى ابراهيم بورقي ويلي څه موده وړاندې مسعود ناروغه وو، خو اوس يې صحت ښه دى :
'' دا ډول بې بنسټه رپوټونه حقيقت نه لري، او غواړي چې د طالبانو تحريک کمزورى وښيي . څو مياشتې مخکې يې د شکر او د فشار ناروغي لرله، خو اوس روغ رمټ دى . ''

ښاغلى بورقي همدارنگه د مسعود د پوښتورگو د کار پرېښودو خبره ردوي او وايي چې په دغه اوونۍ کې يې د دويم واده د مراسمو تابيا درلوده .

بل خوا د مولوي جلال الدين حقاني زوى بدرالدين حقاني هم رسنيو ته د تېلې فون پر کرښه له يوۀ ناڅرگنده ځايه ويلي چې د چهار شنبې په ورځ يې د مسعود له چلوونکي سره تېلې فوني خبرې کړې دي، او د هغه د مړينې خبره يې رد کړې ده .