يوازې د روان ٢٠٠٨ کال په جون مياشت کې لږ ترلږه په افغانستان کې ٤٥ بهرني سرتېري ووژل شول .

يوازې د روان ٢٠٠٨ کال په جون مياشت کې لږ ترلږه په افغانستان کې ٤٥ بهرني سرتېري ووژل شول .

دا شمېره تر هغې ډېره زياته ده چې په همدې موده کې په عراق کې بهرني سرتېري وژل شوي ول .

د ناټو يوه لوړپوړي قومندان په افغانستان کې د نړيوالو سرتېرو درلودونکو هېوادونو ته ويلي چې په دغه هېواد کې خپل سرتېري زيات کړي .

جنرال جان کراډاک په ويانا کې د خپلو خبرو په ترڅ کې ويلي چې په افغانستان کې د دغه پوځي ماموريت لپاره ډېرو څرخکو ته اړتيا وه .

په افغانستان کې د ناټو ځواکونو يوه وياند ويلي چې اوسمهال ډېرى بهرني سرتېري په افغانستان کې مېشت دي او له وسله والو سره په عملياتو بوخت دي .

خبريالان بيا په دې اند دي چې دا ددې څرگندونه کوي چې سږ کال د طالبانو ځواک تر تېرو کلونو ډېر شوى دى .

وسله والو طالبانو په تېره جون مياشت کې د کندهار پر زندان له ځانمرگي بريد وروسته شاوخوا ٩٠٠ زندانيانو ته له زندانه د خپلو پښو سپکولو لاره اواره کړه .

له دغه بريد وروسته طالبان په دې توانېدل چې د کندهار يوه مهمه ولسوالۍ د څه مودې لپاره ترخپلې ولکلې لاندې راولي .

دا په داسې حال کې ده چې تېره مياشت د ملگرو ملتونو سازمان اعلان کړى و، چې د روان ميلادي کال تر نيمايي پورې د وسله والو طالبانو په بريدونو کې شاوخوا ٧٠٠ افغان سرتېري او ولسي وگړي وژل شوي دي .

دغه شمېره د تېرکال د همدې شپو په پرتله ٦٠ په سلو کې زياته شوې ده .

ځينې شنونکي بيا له عراق سره په پرتله په افغانستان کې د دې ډول تلفاتو او مرگ ژوبلو لامل په دغه هېواد او په عراق کې د تاوتريخوالي ډېروالى په گوته کوي .

تېره اوونۍ د امريکا د دفاع وزارت په يوه خپاره کړي رپوټ کې وړاندوېينه کړې وه چې ښايي وسله وال طالبان د ٢٠٠٨ کال په اوږدو کې خپلو بريدونو ته زور ورکړي .

همدارنگه په راپور کې راغلي وه چې د افغانستان په ختيځو سيمو کې د طالبانو په بريدونو کې ٤٠ په سلو کې زياتوالى راغلى دى .