ناټو په افغانستان کې د امريکا په مشرۍ شاوخوا پنځوس زره سرتېري لري .

دغه خبره د ايساف ځواکونو بي بي سي ته په رالېږل شوې خبرپاڼه کې کړې ده .

خبرپاڼه زياتوي د سوېلي نارامه هلمند ولايت په نهر سراج ولسوالۍ کې د ايساف يو سرتېرى هغه مهال ووژل شو کله چې په گزمه بوخت و .

همدارنگه، ايساف د يوې بلې خبرپاڼې په خپرولو سره ويلي چې د هلمند په سنگين ولسوالۍ کې يې يو بل سرتېرى له وسله والو طالبانو سره په جگړه کې وژل شوى دى .

د ايساف ځواکونو د خپلې پاليسۍ له مخې ددغو وژل شويو سرتېرو د تابعيت په اړه څه نه دي ويلي .

د يادونې وړ ده چې په هلمند ولايت کې ډېرى برتانوي پوځيان له وسله والو طالبانو سره په جگړه بوخت دي .

همداراز، د امريکا په مشرۍ د ايتلاف ځواکونو د يوې خبرپاڼې په خپرولو سره اعلان کړى چې په ختيځ ننگرهار ولايت کې يې يو سرتېرى وژل شوى دى .

ددغې خبرپاڼې په وينا، دغه بهرنى سرتېرى هغه وخت ووژل شو کله د گزمې پرمهال يې موټر د سړک د غاړې پر ښخ کړاى شوي ماين وخوت .

ايتلافي ځواکونو ددغه وژل شوي سرتېري د وژل کېدا مشخص ځاى نه دى په گوته کړى، خو ويلي دي چې ددغه سرتېري د تابعيت په اړه بل وروسته معلومات ورکړي .

دا په داسې حال کې ده چې په افغانستان کې د امريکايي پوځيانو يوه سيمه ييز قومندان ويلي چې د تېر کال په پرتله د دغه هېواد په ختيځ کې د وسله والو بريدونه ٤٠ په سلو کې ډېرشوي دي .

دده په وينا، له پاکستان سره په سرحدي سيمو کې د روان کال د اپريل له مياشتې راهيسته د ولسي خلکو په گډون د امريکا ٤٠ پوځيان وژل شوي دي .

بل خوا ايتلافي ځواکونه وايي چې د پکتيکا په گومل او سروبي ولسواليو کې يې په يوه نښته کې ٢٢ وسله وال طالبان وژلي دي .

	تر دې وړاندې ايتلافي ځواکونو په دغه ولايت کې د ٥٥ وسله والو طالبانو د وژل کېدو د ٢٥ د ټپي او درو نورو د ژوندي نيولو ادعا کړې وه .

د ايتلاف ځواکونو د خبر ترمخه، دغو وسله والو يادې شوې ولسوالۍ تر بريد لاندې راوستې وې او له پوليسو سره يې سپکه او درنه وسله کارولې وه .

ايتلافي ځواکونه وايي دوى د پوليسو مرستې ته ور ودانگل او وسله وال يې تر خپل بمبار لاندې ونيول .

خو طالبانو لا په دې اړه بې خبري ښودلې ده .

دا په داسې حال کې ده چې تر دې وړاندې ايتلافي ځواکونو اعلان کړى و چې د پکتيکا په ولايت کې يې ٥٥ وسله وال طالبان وژلي، ٢٥ نوريې ټپيان او درې يې ژوندي له ځانه سره وړي دي .

دوى ويلي وه چې دغه وسله وال د پکتيکا په ژيړوک ولسوالۍ د جون پر ٢٠ وژل شوي او ټپي شوي دي .

هلمند کې نښته شوې

ايتلافي ځواکونو د يوې بلې خبرپاڼې په خپرولو سره ويلي چې په يوه نښته کې يې 'يو شمېر' وسله وال طالبان وژلي او ١٢ نوريې ژوندي نيولي دي .

	ايتلافي ځواکونوه وايي په هلمند کې يې په بمبار کې يو شمېر وسله وال طالبان وژلي دي.

دوى وايي نښته هغه وخت رامنځته شوه کله چې دوى د هلمند په رېگ ولسوالۍ کې د وسله والو طالبانو د يوه ځايي قومندان په لټه کې ول، چې طالبانو ورباندې بريد وکړ .

د ايتلاف په وينا دوى په ځوابي بريد کې له هوايي ځواکونو نه کار واخيست چې پاپله کې يې يو شمېر وسله وال طالبان ووژل .

ايتلافي ځواکونو دغه خبرپاڼه د جون پر ٢٤ خپره کړې ده .