د وسله والو طالبانو له بريد وروسته ايتلافي ځواکونو بمبار وکړ او ١٥ طالبان پکې وژل شوي دي .

د پکتيا د سيد کرم ولسوالۍ د ٢٠٣ تندر قل اردو مطبوعاتي دفتر بي بي سي ته وويل تېره شپه شاوخوا ١٢ بجې له يوه درې ساعته وسله والې نښتې وروسته د ايتلاف ځواکونو په بمبار کې ١٥ وسله وال طالبان ووژل شول او درې نور ژوندي ونيول شول .

دوى وايي چې نيول شوي وسله وال درې واړه بهرنيان دي چې يو يې د کويټ، بل د سعودي عربستان او درېيم يې د ترکيې اوسېدونکي دي .

د سيد کرم ولسوال اغا محمد احمدزي بي بي سي ته وويل بهرنيو او کورنيو طالبانو تېره شپه ١٢ بجې د ولسوالۍ پر دوانۍ بريد وکړ چې له درې ساعته نښتې وروسته طالبان په شا وتمبېدل او ددې ولسوالۍ په عثمان خېلو سيمه کې د غره يوې ډډې ته شول .

د احمدزي په وينا له هغه وروسته له ايتلافي ځواکونو مرسته وغوښتل شوه چې د الوتکو په وسيله يې د عثمان خېلو سيمه بمبار کړه چې ١٥ وسله وال پکې ووژل شول .

دى وايي چې دوه ټپي شوي عربان نيول شوي چې اوسمهال د سيد کرم په روغتون کې تر درملنې لاندې دي .

دده په وينا پوليسو ته کوم زيان نه دى اوښتي خو د ولسوالۍ ودانۍ زيانمنه شوې ده .
وژل شوي وسله وال طالبان د عثمان خېلو په سيمه د ولسي خلکو له خوا خاورو ته سپارل شوي دي .

وسله والو طالبانو په دې اړه بې خبري ښودلې ده او ايتلافي ځواکونو هم تر اوسه په دې اړه څه نه دي ويلي .

بل خوا د پکتيا د څنگلوري خوست ولايت په نارامه صبريو ولسوالۍ کې افغان او بهرنيو ځواکونو عمليات پيل کړي دي .

خو ددغو عمليات په اړه د نورو معلوماتو خبر تر اوسه نه دى ورکړل شوى .

همدارنگه تېره ورځ په دغه ولسوالۍ کې د سړک د غاړې ماين پرداسې مهال د ولسي وگړ پر گاډي وچاودېد چې له سيمې څخه بهرني پوځيان د تېرېدا په حال کې ول .

په دغه چاودنه کې درې ولسي وگړي ووژل شول او بهرنيو ځواکونو ته هېڅ زيان پکې نه دى رسېدلى .

وسله والو طالبانو بيا ادعا کړې ده چې چاودنه ددوى د جنگياليو له خوا شوې ده او د ناټو دوه گاډي يې له منځه وړي او پکې سپاره کسان وژل شوي دي .