بدخشان د افغانستان په شمال لوېديځ کې يو له هغو ولايتونو څخه دى چې سړکونه يې خام او سخت دي چې ډېرى خلک له يوې سيمې نه بلې ته د خرو او کچرو په وسيله ځي.

دغه پېښه نن (چارشنبې، د غبرگولي پر اتمه) سهار هغه مهال وشوه کله چې د بدخشان ولايت د درايم ولسوالۍ نه فيض اباد ته د ښځو او ماشومانو په گډون له ولسي وگړو يو ډک کاماز موټر د ارگو ولسوالۍ د ريزکان په کوتل کې چپه شو .

د بدخشان د ترافيکو عمومي مدير محمد ابراهيم وايي په پېښه کې د ماشومانو او ښځو په گډون ١٤ کسان وژل شوي او ٥٢ نور ټپيان دي .

نوموړى زياتوي چې د پېښې ډېرى قربانيان ښځې او ماشومان دي .

د نوموړي پروينا، دغه خلک د شېوې په نامۀ ځاى ته روان وو چې هلته يې د مالونو لپاره څړځايونه ول .
د پېښې د رامنځته کېدا لامل د لارې خرابوالى په گوته شوى دى .

ځايي چارواکي وايي چې ټپيان د فيض اباد ٨٠ بستريز روغتون ته وړل شوي او هلته تر درملنې لاندې دي .

د ټپيانو روغتيايي حالت د اندېښې وړ او نازک ښودل شوى دى، او ځايي چارواکي وايي چې ټپيان بايد ژر ترژره کابل ته د الوتکو له لارې يوړل شوي که نه نو ښايي چې د مړو شمېره تردې هم ډېره شي .

بل خوا د همدې ولايت د امنيه قومندان اقا نور وايي چې په پېښه کې پنځه ښځې، شپږ ماشومان او درې نارينه مړه شوي دي .

بدخشان د افغانستان په شمال لوېديځ کې يو له هغو ولايتونو څخه دى چې سړکونه يې خام او صعب العبور دي .

تر دې وړاندې هم دا ډول ترافيکي پېښه تېر کال د غزني په ولاتي کې شوې وه، چې په پايله کې يې ٣٢ کسان وژل شوي وو او ٢٥ نور ټپيان وو .