غزل اکمل له کابله

	په افغانستان کې د څو اونيو راهيسې واورو د هيواد په بيلابيلو برخو کې خلکو ته زيانونه اړولي دي

د بدخشان ولايت استازې سلطان محمد اورنگ وايي چې د لسو ولسواليو لارې مرکز ته بندې شوي دي او زيات شمير خلک د خوراکي توکو له کموالي سره مخامخ دي .

دا پداسې حال کې ده چې افغان حکومت او ځينو مرستندويه ټولنو اعلان کړى چې په روان ژمي کې يې د افغانستان ١٧ ولايتونو ته مرستې رسولې دي .

د بدخشان ولايت استازى سلطان محمد اورنگ چې نوى له بدخشان څخه کابل ته راستون شوى بي بي سي ته وويل د سړې هوا له کبله ٩ کسه مړه شوي چې څلور يې ماشومان دي .

د هغه په وينا په دغو ولسواليو کې خلک د خوراکي توکو له کموالي ، سړې هوا او داسې نورو ستونزو سره مخامخ دي چې له دوى سره هېڅ ډول مرستې نه دي شوي .

په دغو ولسواليو کې درواز ، راغستان ، شغنان ،کشم او داسې نور شامل دي .

ښاغلى اورنگ زياتوي د بدخشان په ځينو ولسواليو کې د سختې واروې او ددغه ولايت د لسو ولسواليو لارې د وارو له کبله مرکز ته بندى شوي دي .

په همدې ترڅ کې د افغانستان د طبعي پيښو پر وړاندې د مبارزې د ادارې مشر عبدالمتين ادراک وويل چې د بدخشان ولايت ته د ملگرو ملتونو د خوراک نړيوال سازمان ډبليو اف پي له خوا د خوراکي توکويو لړ مرستې شوي .

خو دوى په پام کې لري چې له څيړنو وروسته دغه ولايت ته د تاجکستان له لارې نورې مرستې ورسوي :

په تيرو څو اونيو کې د افغانستان په ډيرو ولايتونو په ځانگړي ډول په لويديځ کې د سختو ورښتونو ، سړې هو ا ، د خوراکي توکو دکموالي او د لارو د بنديدو له کبله ډيرو
خلکو ته مرگ ژوبله اوښتې ده او تر څنگ يې په زرگونو څاروي مړه شوي او په سلگونو جريبه مځکې له منځه تللي دي .