چارواکي وايي پر پوليسو کمين د بدخشان په راغستان ولسوالۍ کې شوى

په بدخشان کې امنيتي چارواکي وايي په راغستان ولسوالۍ کې د پوليسو يو کاروان چې ولايتي مرکز فيض اباد ته روان و، د وسله والو تر بريد لاندې راغى او ١٢ کسان پکې ووژل شول.

چارواکي وايي په وژل شويو کې اتۀ تنه پوليس او پاتي ملکي خلک دي چې تېره ورځ (يکشنبه) د وسله والو په کمين کې کېوتل.

طالبانو د بريد پړه پر غاړه اخيستې ده، خو لاهم ښکاره نه ده چې رښتيا دا کار د طالبانو و او که سيمه ييز وسله وال قاچاق وړونکي به يې تر شا وو.

هاخوا، په بل شمالي ولايت تخار کې چارواکي وايي د ځانمرگو بريدونو يو چمتو کوونکى يې له ناکامې چاودنې وروسته نيولى دى.

په کابل کې د کورنيو چارو وزارت په يوه خبرپاڼه کې وايي پوليسو يو سړى چې د تخار د يوۀ لوړپوړي پوځي چارواکي د کور له مخې يې تېره ورځ چاودنه وکړه په ټپي حالت کې ونيو. وايي له نيول شوي سړي څخه له پلټنو وروسته معلومه شوه چې دى د ځانمرگو بريدونو چمتو کوونکى و او په څو مخکينيو پېښو کې يې لاس درلود.

خبرپاڼه وايي د نيول شوي سړي دکور له پلټنې وروسته له هغۀ سره پنځه له ليرې کنترولېدونکي بمونه او زيات شمېر چاودېدونکي توکي وموندل شول.

د افغانستان شمالي سيمې نسبتا ارامي دي، خو کله ناکله پکې د ناامنۍ پېښې کېږي.