بابرا پلېټ له اسلام اباد څخه

	پرويز مشرف ظاهرآ د امنيت او کار له امله کابل ته له سفره لاس اخيستى دى

اعلاميه وايي د ښاغلي مشرف پر ځاى به لومړى وزير شوکت عزيز کابل ته سفر کوي . د دغې جرگې په باب نظر نژدې يو کال وړاندې د ولسمشرانو بوش ، کرزي او مشرف په يوې غونډې کې پيدا شوى و .

دغه جرگه به د افغانستان او پاکستان په پوله د طالبانو د بغاوتونو د مخنيوي پر لارو چارو غور کوي .

بې له شکه چې په جرگه کې ناڅاپه د ولسمشر مشرف د برخې نه اخيستو پريکړه به سيورى غوړوي .

د پاکستان له قبايلي سيمو څخه واردمخه په لسگونو مشرانو په دغې جرگې کې له گډون کولو لاس اخيستى دى . دغه کسان يا له طالبانو ډاريږي او يا هم په قبايلي سيمو کې د پاکستاني پوځ پر عملياتو قهر وړي دي او د هغې له امله په جرگه کې برخه نه اخلي .

ډير پاکستاني قبايل په دې نظر دي چې د طالبانو په نشتوالي کې دغه جرگه بې مانا ده .

په وروستيو شېبو کې له جرگې څخه د ولسمشر مشرف وتل به د دۀ او ښاغلي کرزي ترمنځ واردمخه ترينگلې اړيکي ښايي نورې هم خړې پړې کړي .

دوى دواړو په افغانستان کې د روان تاوتريخوالي له امله پړه پر يوۀ او بل اچولې ده .

د جنرال مشرف دغه پريکړه به د امريکا د رټلو په مانا هم وي . ولسمشر مشرف په دې وروستيو کې د متحدو ايالاتو له خوا پر هغو نيوکو خوښ نه دى چې وايي پاکستان په قبايلي سيمو کې د طالبانو او القاعدې په وړاندې جگړې کې ډير څه نه کوي .