د کونړ په غرنيو سيمو کې د افغان دولت مخالفين فعاله دي او د هغوى موندل تر اوسه افغان پوځ او نړيوالو ځواکونو ته گران ښکاره شوى دى .

په دغو گډو عملياتو کې د افغانستان د ملي ځواک او د ايتلافي ځواکونو لږ تر لږه ١٥٠٠ سر تيرو برخه اخيستې ده چې ٨٠٠ يې افغانان دي .

د افغانستان د دفاع وزارت وايي تر اوسه دوى ددغو عملياتو په ترڅ کې د دښمن ٦ تنه وژلي او ډيري زياتې سيمې يې له هغو نه پاکې کړي دي .

د دفاع وزارت زياتوي چې د دښمن له خوا ورسره جدې مقاومت نه دى شوى .

په کابل کې ددفاع د وزارت وياند نبي اعظيمي وايي دغه گډ عمليات د دفاع د وزارت د هغه ستراتيژيک پلان يوه برخه ده چې له وړاندې نه يې ددښمن د پلان د مخ نيوي او ختمولو په موخه پيل کړي دي .

د دفاع د وزارت د وياند ترمخه دا لومړى ځل دى چې سر تېري يې د گډو عملياتو په لو مړۍ ليکه کې جنگيږي او هم په لو مړي ځل د افغانستان د ملي ځواک سر تېري په عملياتو کې له چورلکو نه کار اخلي .

کونړ د افغانستان يو له هغو ولايتونو څخه دى چې دکابل د حکو مت مخاليفين پکې زيات فعاليت لري تيره اوونۍ هم په دغه ولايت کې په يوه ښوونځي باندي د توغنديو په بريد کې ٦ تنه ماشومان دغلته ووژل شول او گڼ شمير نور يې ټپيان شول .