طاهر خان له اسلام اباده

	په دا وروستيو کې د بلوچستان په ايالت کې گڼ شمير چاودنې او بريدونه شوي دي .

دوى يوۀ واده ته د روانو کسانو په ډله کې وو چې گاډى يې د بلوچستان په ډېره بگټي کې پر ځمکني ماين وخوت.

پاکستاني چارواکو د ماين د ايښودو پړه د بلوڅو پر يوه مخور مشر، نواب اکبر بگټي اچولې، چې له څو مياشتو راهيسې له حکومتي ځواکونو سره په خونړيو نښتو بوخت دى.

وژل شوي د مسوري بلوڅ ټبر غړي دي چې د نواب مخالفت کوي.

دا چاودنه له کوټې نه ٣٠٠ کيلومتره ختيځ پلو د رکني په نامۀ سيمه کې په داسې وخت کې پېښه شوه چې د ورا والو گاډى پر ماين وخوت .

د بلوچستان د حکومت وياند رازق بکتي وويل دا پېښه سهار اته بجې او ٣٠ دقيقې وشوه .

رازق بکتي زياته کړه چې په وژل شويو کسانو کې ښځې او ماشومان شامل دي .

په دې پېښه کې اووه کسان ټپيان شوي هم دي چې په سيمه ييزو روغتونونو کې يې درملنه کيږي .

ډيره بگتي او کوهلو کې په دې وروستيو کې د ماينونو د چاودنې پېښې ډيرې شوي دي .

دا لا معلومه نه ده چې دا ماينونه چا ښخ کړي دي .

د ډيره بگتي ځايي ناظم کاظم بگتي څو ورځې وړاندې منلې وه چې دولت او باغي بلوڅو د ځانونو د دفاع لپاره دغلته ماينونه ايښي دي .

خو د بلوچستان د دولت وياند وايي دوى ماينونه نه ښخوي بلکه د نورو ماينونه پاکوي .