د روسيې د بهرنيو چارو وزير وايي حماس به اوس پر خپلې دندې له سره غور کوي .

دا غونډه د حماس چې اوس د فلسطيني ادارې مشري کوي او د منځني ختيځ د سولې د يوۀ منځگړي ترمنځ لومړنۍ ناسته ده .

روسيه غواړي چې حماس له تاوتريخوالي لاس واخلي او اسراييل په رسميت وپېژني . خو د لومړۍ ورځې خبرو نه کوم برياليتوب لارۀ او نه هم پکې څه مراعات وشول که څه هم حماس وويل چې دوى له اسراييل سره په اړيکو کې پر مختگ غواړي .

په مسکو کې د بي بي سي يو خبريال وايي روسيه د اړيکو په باب په محتاط ډول هيله منه ده او تمه لري چې دوام به ومومي خو زياته يې کړه چې په دې نوښت روسيې اسراييل غصه کړى او د نورو منځگړو له لارې څخه هم اوښتى دى .

د روسيې د بهرنيو چارو وزير سرگې لاوروف وويل :

(( زۀ يو څه محتاطه هيله لرم اوس چې حماس د فلسطيني او منځني ختيځ د سياست مشروع فکتور دى نو پر خپل نوي رول به له سره غور کوي د دغۀ رول لپاره به ښايي هغه وخت دوى چمتو نه وو چې ټاکنې کيدې خو اوس به حماس پر خپلې ونډې له سره غور کوي او حماس به د فلسطيني ولس په وړاندې پر خپل مسووليت له سره غور کوي .))

بل پلو د عربي ټولنې د بهرنيو چارو وزيران نن په قاهرې کې سره ويني چې تمه ده خبرې به يې په فلسطيني ټاکنو کې د حماس پر بري غور کوي .

فلسطيني ادارې ته د نړيوالو مرستو اټکل شوي کمښت عربي هيوادونه اندېښمن کړي دي . شننونکي وايي مصر او سعودي عربستان په هيله دي چې حماس داسې يوۀ دريځ ته وهڅوي چې لږ تر لږه د اسراييل شته والى ومني .

تمه ده چې د بهرنيو چارو زيران به له اسراييل څخه هم وغواړي چې د ١٩٦٧ کال پولو ته ستانۀ شي . د عراق پر تاوتريخواليو به هم خبرې وشي .

عراقي حکومت غواړي چې پر نورو عربي هيوادونو ټينگار وکړي چې په بغداد کې يې ديپلوماتيک استازي د نوي عراقي دولت ملاتړ وښيي .