محمد قاضي زاده له هراته

	اسماعيل خان : دوه ورځې ارام کښېنئ زۀ به د پرونيو پېښو عاملين ونيسم

نن سهار په هرات کې کراري وه خو له ځايي وخت سره سم د ماپښين په دوه بجې په سلگونو مظاهره کوونکي د ښار په زړۀ او د والي دفتر ته نژدې ټول شول .

مظاهره کوونکو د ځايي مسوولينو د ليرې کولو او د هغو کسانو د محاکمې غوښتنه لرله چې د دوى په وينا په پرونيو پېښو کې ښکېل وو .

اسماعيل خان له خبريالانو سره په خبرو کې وويل چې په پرونيو پېښو کې پنځه کسان نۀ بلکه څلور وژل شوي دي او ١٥٥ پکې ټپيان شوي دي .

په نننيو مظاهرو کې د امنيتي ځواکونو له خوا په ډزو کې پنځه کسه ټپيان شوو .

په هرات کې د روغتون چارواکو بي بي سي ته وويل چې د پرونيو پېښو ډير ټپي شوي کسان نن د درملنې په هيله ورغلي وو .

په يوۀ خبري کانفرانس کې تيره شپه اسماعيل خان وويل چې دوى پلټنې کوي او لا معلومه نه ده چې په دغو خونړيو پېښو کې د چا لاس و .

ښاغلي اسماعيل خان وويل په دغو پېښو کې د هيڅ شي امکان نه ردوي . د يوې پوښتنې په ځواب کې دۀ د گاونډيو هيوادونو لاس هم ممکن وبالۀ خو نور جزييات يې ورنه کړل .

له کابله ورغلي د ملي پوځ په سلگونو سرتيري او ځايي امنيتي ځواکونه په واټونو گزمه کوي .

تيره شپه د ماښام له ٨ بجو وروسته په هرات ښار کې گرځبنديز و .

د افغانستان نور خبرونه د دې ځاى په کېکاږلو ترلاسه کولى شئ