حکيم سمور کابل

	ښاغلي اتمر دا څرگندونې بي بي سي سر ه په يوې ځانگړې مرکه کې وکړې

د افغانستان د کليو او پراختيا وزير محمد حنيف اتمر واېي که څه هم د لندن غونډه سياسي موخې لرى ، خو وايي دولت دا تمه هم لرى چې نړيواله ټولنه د هيواد د ملي پر مختيا د تگلارۍ د منلو تر څنگ ، يو لړ مالي ژمنې هم وکړي .

ښاغلي اتمر د بي بي سي سر ه د يوې ځانگړې مرکې په ترڅ کې وويل کيداى شي چې افغانستان په دولسو کلونو کې په خپلو پښو ودريږي چې د هر کال لپاره به يي افغانستان 4000 مليونو امريکايي ډالرو ته اړتيا ولرى .

ښاغلى اتمر وايي د غه کار به هغه وخت شونى وي چې د نړيوالو مرستو زياته برخه ددولت له لارې د بيار غونې په بنسټيزو چارو ولگولې شي .

په تيرو څلور کلونو کې د افغانستان بيارغونې ته د راغلو 11000 مليونو ډالرو څخه يوازي ، په سلو کې له ٢٥ نه تر ٣٠ پورې يې دولت ته ورکړل شوي او پاتې يې د نړيوالو او کورنيو ناحکومتي موسسو او د ملگرو ملتونو د اړوندو موسسو له لارې لگيدلې دي .

د افغانستان ډيري خلک په دغه ډول د پيسو له لگښته راضي ندي .
ښاغلى اتمر وايي دولت هم تر ډيره له دغې وضعې ناراضه دى . د کليو او پر اختيا وزير د خپل وزارت له بيلگې يادونه کوي چې همدا اوس د ملي پيوستون د پروگرام تر مخه د افغانستان په 11000 کليو او بانډو کې د بيارغونې 15000 پروژې پلى کوي .

د ښاغلى اتمر ټينگار کوي چې په دولت کې د وړتياوو د لوړوالي داسې بيلگې شته چې نړيوال پر ې قانع کړاى شي چي د دولت پر وړتيا باور وکړي او لږ تر لږه د مرستو 50 په سلو کې ددولت په واک کې ورکړي .

خو د امريکا او جاپان په څير يو شمير هيوادونه شته چې د خپلو کورنيو قانونو د محدوديتونو تر مخه نشي کولى چې مخامخ مرستې د افغانستان دولت ته ورکړي .

ښاغلى اتمر وايي که چيرى دغه هيوادونه پيسي دولت ته نه ورکوي ، لږ تر لږ دا کار خو دې وکړي چې د افغانستان په نامه د راغلو پيسو حساب ورکړي

د اقتصاد نور خبرونه د دې ځاى په کېکاږلو ترلاسه کړئ