محمود کوچى کابل

	په افغانستان کې په دې وروستيو کې يوزيات شمير خبريالان روزل شوي دي

د المان هيواد د افغانستان د ملي ټلويزيون د سمبالښت په موخه څه نا څه نيم ميليون ډالره مرسته کړې ، د افغانستان د ملي راډېو ټلويزيون مشر نجيب روشن وايي چې له دغو پيسو نه به د خپرونو د بيا رغاونې په چارو کې گټه واخيستل شي

د څو مياشتو راهيسې د ملي ټلويزيون په خپرونو کې يو لړ بدلونونه او نوښتونه رامنځته شوي ، د ښاغلي روشن په وينا که چيرته په خپرونو کې نوښت رامنځته نه شي ، نو ملي ټلويزيون به د نورو خصوصي رسنيو سره په سيالى کې پاتې راشي

د افغانستان د ملي راډيو ټلويزيون مشر نجيب روشن وايي په پام کې ده چې د دولت تر کنټرول لاندې دغه دوه رسنى به گام په گام په برياليو او بې پرې رسنيو بدلې شي ، نوموړى په دې خبره ټينگار کوي چې د هرې ورځې په تيريدو سره ملي ټلويزيون خپل کتونکي له لاسه ورکوي .

(( له بده مرغه د افغانستان ملي راډېو ټلويزيون د خصوصي ټلويزيونونو په پرتله ورځ په ورځ خپل کتونکي له لاسه ورکوي.))

په پام کې ده چې د دولت تر کنټرول لاندې دغه دوه رسنى به گام په گام په برياليو او بې پرې رسنيو بدلې شي نجيب روشن

ښاغلي روشن د ملي ټلويريون د کتونکو د کچې راټيټيدنه د هغو خپرونو خپرول وښودل چې نه بريالى دي او نه هم بې پرې ، د نوموړي په وينا پخوانيو دولتونو هڅه کوله چې دغه رسنى د خپلو ايډيولوژيکو هدفونو لپاره وکاروي .

د ملي راډيو ټلويزيون مشر وويل چې دغه نيم ميليون ډالره مرسته به په بيلابيلو برخو کې ولگول شي هغه زياته کړه چې د کارکونکومياشتينى تنخواگانې او د نويو سامانونو او وسايلو را نيونه هغه څه دي چې ددغې مرستې ځېنې به پرې ولگيږي .

((دغه پيسې ډويچ ويلې او د المان د بهرنيو چارو وزارت زموږ سره مرسته کړې ، ددغو پيسو لگښت او څارنه د المانيانو له خوا کيږي موږ يوازې د خپلو اړتياوو لست د ټلويزيون د تخنيکي همکارانو په مرسته برابر کړى چې د ځينو خپرونو د بډاينې لپاره پرې سامانونه او وسايل پوره کړو.))

اوس مهال په افغانستان کې پنځه ټلويزيوني شبکې خپرونې لري چې څلور يې خصوصي او يوه يې د افغانستان دولت تر څارنې لاندې کار کوي ، د ملي ټلويزيون سره ډيرې خبري سر چينې د خبرونو په راټولولو کې مرسته او همکاري کوي.

د هنر او ادب پاڼې ته د دې ځاى په کېکاږلو ستانۀ شئ