تر عراق وړاندې په کابل کې هم امريکايي وزير ويلي وو چې راتلونکى کال به له افغانستانه يو شمير امريکايي سرتيري وځي .

هغه وويل چې امريکا به په عراق کې له خپلو اصلي ځواکونو څخه دوې جگړه ييزې لواوې کمې کړي چې د ٥٠٠٠ يا ٨٠٠٠ سرتېرو په شاوخوا کې کېږي او په دې ډول يې د عراقي ځواکونو چمتووالي ته گوته ونيوله چې د خپل هيواد د امنيت چارې به پر خپله غاړه اخلي.

دامريکايي ځواکونو شمېر بيا بيا اوښتى دى، چې اوس نژدې ١٥٠ زرو ته رسېږي.

ښاغلي رمسفيلډ وويل د جگړه ييزو ځواکونو شمېر به کم کړى شي، خو د هغو پوځيانو په شمېر کې به يوه ناڅرگنده اندازه زياتوالى راځي چې د عراقي پوځيانو په روزلو بوختېږي.

ښاغلي رمسيفيلډ د امريکايي پوځيانو يوې غونډې ته وينا کوله.

هغه وويل امريکا سملاسي په عراق کې د کومې تلپاتې پوځي اډې د جوړلوټاکلى هوډ نلري او د پوځيانو د هرډول راتلونکې ځاى پرځاى کونې په اړه ټولې خبرې به هغه مهال ته پرېښودل شي چې د عراق نوى حکومت په کار پيل کوي. او دا هغه څه دي چې د هغه په وينا ښايي اوونۍ او يا مياشتې ونيسي.

تر عراق وړاندې ښاغلې رمسفيلډ د افغانستان د سفر په ترڅ کې هم ويلي وو چې د ٢٠٠٦ کال په ترڅ کې به له هغۀ هيواده هم يو شمير سرتيري وباسي .

د نړۍ نورو پښتو خبرونو ته دا ځاى کېکاږئ