ويل کيږي چې په دې وروستيو کلونو کې به دا په کابل کې د خپل ډول لومړنۍ مهمه غونډه وي .

د دغې غونډي مشري به افغانستان او برتانيا په گډه کوي . برتاينا په دغې غونډې کې د نړۍ د ٨ تر ټولو سترو صنعتي هيوادونو د ټولنې د مشرتابۀ له دريځه په دې غونډې کې برخه اخلي .

په نورو برخه والو کې به د افغانستان شپږ گاونډي ، پاکستان ، چين ، ترکمنستان ، ازبکستان ، تاجيکستان او ايران وي .

دغه راز هند ، ترکيه ، متحد عرب امارات ، قزاقستان او قرغزستان هم په دې غونډه کې گډون کوي .

برخه وال هيوادونه به د وزيرانو او نورو لوړ پوړو مامورينو په کچه استازې لري .

د افغانستان د بهرنيو چارو وزارت وايي دا کانفرانس په سيمه کې د اقتصادي پرمختيا لپاره يوه بې سارې موقع پيدا کوي او ورسره به د امنيت په ښه کولو کې هم لاس وکړي .

دا کانفرانس به د سيمې د هيوادونو او برخه والو ترمنځ پر اقتصادي همکارۍ هم غور کوي .

تمه ده چې پر برېښنا ، انرژۍ ، ترانسپورت ، ترانزيت سوداگرۍ ، د پولو د کنترول ، پانگونې او د سوداگريز چاپېريال لپاره د شرايطو د چمتو کولو پر برخو خبرې وکړي .