خپلواک ساپى په کابل کې

	دغو ځانمرگو بمي بريدونو نړيوال سوله ساتي ځواکونه په نخښه کړي وو .

ښاغلي کرزي دغه ډول بريدونه له اسلام سره دښمني بللې او د هيواد په امنيتي ځواکونو يې په بريدونو کې د لاس لرونکو کسانو د موندلو غږ کړى دى .

ښاغلي عنان بيا له خپل لورې په افغانستان کې په ميشتو نړيوالو سوله ساتو ځواکونو غږ کړى چې د هيواد د امنيت د خونديتوب لپاره خپل ټول امکانات وکاروي .

د کورنيو چارو د وزارت وياند د ښار دننه او شاوخوا د گزمو او د څار د پوستو د ډيريدو په گډون د نويو احتياطي امنيتي گامونو د پورته کيدو خبره هم کوي .

د کورنيو چارو د وزارت سرچينې په کابل کې د دوشنبې ( د لړم ٢٣ د نومبر ١٤ ) په مازيگر د يوه ساعت په توپير د تر سره شوو دوو ځانمرگو بمي بريدونو د قربانيانو شميره
اوس ١٦ تنه ښيې .

په داسې حال کې چې په لومړنيو رپوټونو کې د وژل شويو او ژوبلو ټوليزه شميره ١١ تنه ښودل شوې وه .

د وزارت وياند يوسف ستانيزي بي بي سي ته وويل چې اوس د ايساف د يوه الماني سرتيري په گډون د څلورو کسانو د وژل کيدو او د دوو نورو الماني سرتيرو په گډون د ١٢ کسانو د ژوبلې خبره يقينې شوې ده .

د موټر بم لومړنى بريد د ښار ختيځ پلو د کابل جلال اباد پر لويه لاره د انتخاباتو د گډ دفتر مخې ته د ايساف د همدغو الماني سرتيرو د گزمې په موتړ تر سره شو .

يو ساعت وروسته د لومړنۍ چاودنې ځاې ته ورڅيرمه په داسې حال کې بله چاودنه وشوه چې د خلکو گڼه گوڼه ډيره شوې وه .

د دويمې چاودنې قربانيان له څيرمې ملکي کسان بلل شوي دي .

د ښاغلي ستانيزي په وينا د چاودنو تر وروسته درې نور کسان هله ژوبل شول چې د چاودنو ځايې ته ورڅيرمه يې د سپرلۍ په موټر د برتانوي سرتيرو له لورې ډزې وشوې .

د دغو ډزو لامل د سرتيرو خبرداري ته د چلونکي نه پاملرنه ښودل شوې ده .

امنيتي چارواکو تر اوسه د چاودنو په تور څوک نه دي نيولي او نه د بريد کونکو د هويت په اړه دقيق معلومات لري .