په دې وروستيو کې طالب اورپکو د افغان پوليسو پر ضد خپل بريدونه گړندي کړي دي .

د افغانستان په هلمند ولايت کې له طالب اورپکو سره په نښته کې ٩ افغان پوليس وژل شوي دي .

په دغو کسانو کې يو تن د پوليسو مشر و .

د چارواکو په وينا په دغې پېښې کې چې د هلمند په يوې غرنۍ سيمې کې وشوه څلور تنه طالب اورپکې هم وژل شوي خو تر جگړې وروسته يې پاتې کسان په تېښته بريالي شوي .

افغان چارواکو بي بي سي ته وويل له نيول شويو دوو طالبانو څخه يې اوريدلي وو چې د هلمند په يوه سيمه کې گڼ شمير اورپکې ټول شوي دي . دوى په هغۀ لور روان وو چې بريد پرې وشو .

د هلمند چارواکي زياتوي طالبان کلابنده شوي دي خو د اوس لپاره جگړه نشته .

دا په دغه سيمه کې په دې وروستيو وختونو کې د طالب اورپکو له خوا د وژنو د لړۍ يوه بله کړۍ ده .

په تيرو ١٠ مياشتو کې د طالبانو د بريدونو له امله په افغانستان کې تر ١٠٠٠ تنو ډير افغانان وژل شوي دي .