د نړيوالو ځواکونو او افغان پوليسو له خوا په کندهار کې گزمې ډيرې شوي دي

افغان مامورين وايي چې د کندهار په ولايت کې شکمنو طالب اورپکو د ارغنداب ولسوالۍ ولسوال تيره شپه ( د تلې ٢٦ د اکتوبر ١٨ ) په جومات کې وواژۀ .

دا په تيرو څو ورځو کې د طالب اورپکو له خوا په جومات کې دننه دوهم دغه ډول بريد دى . څو ورځې وړاندې په خوست ولايت کې يو ملا د بم په چاودنه کې ووژل شو .

له کندهار څخه په رپورټونوکې دا هم ويل شوي چې په يوې جلا پېښې کې د شک وړ طالب اورپکو د ښوونځي يو سرښوونکى هم وژلى دى .

خبريالان وايي د ښوونځي په سرښوونکي باندې بريد ښايي ښوونځيو ته د زده کوونکو له ليږلو سره د طالبانو د مخالفت ښکارندويي وکړي .