د خوست د علماو شورا له نړيوالو ځواکونو او افغان دولت څخه د امنيت غوښتنه کړې ده .

د افغانستان د خوست ولايت له مرکز څخه سويل پلو ته د تڼيو په ولسوالۍ کې نن ( د تلې ٢٢ د اکتوبر ١٤ ) يوه چاودنه وشوه چې د جومات ملا يې وواژۀ او ١٦ تنه نور يې ټپيان کړل .

د خوست ولايت د پوليسو مشر محمد ايوب بي بي سي ته وويل چې دغه بم د جومات په منبر کې اېښودل شوى و .

چاودنه هغه وخت وشوه چې د جومات مولوي احمد خان ، د جمعې د لمانځۀ خطبه ويله .

ځايي چارواکو د دې چاودنې پړه پر طالبانو واچوله خو تر اوسه پورې طالبانو او يا کومې بلې ډلې څه نه دي ويلي .

د خوست په ولايت کې د علماو د شورا مشر او ولسي جرگې ته د خوست له ولايت څخه کانديد الف شاه له دولت څخه وغوښتل چې د علماو ساتنه وکړي .

د يادونې وړ ده چې په دغې سيمې کې پخوا هم د علماو پر ضد بريدونه شوي دي چې طالبانو يې پړه په غاړه اخيستې ده .