په کونړ کې نړيوال ځواکونه له القاعدې او طالب پاتې شونو سره په مبارزه بوخت دي خو په فارياب او نيمروز کې دغه فعاليت دومره نشته .

په سويل لويديځ ولايت نيمروز کې د يوې چاودنې له امله د هغۀ ولايت د امنيې قومندان نفس خان ووژل شو .

د ځايي چارواکو په وينا دۀ د هغۀ گاډي پلټنه کوله چې شک پرې شوى و .

په موټر کې ځاى پر ځاى شوي چاوديدونکي توکي د ريموټ کنټرول په وسيله والوزول شول چې د امنيې قومندان پکې ووژل شو .

د شمال په فارياب ولايت کې د مرستندويو کارکوونکو يو گاډى چې د تگاب له سيمې څخه بيرته د ولايت مرکز ميمنې ته روان وو هغه مهال په بې دريغو ډزو ودرول شو چې يوۀ ټوپکوال پکې سپارۀ کسان ووژل .

په ختيځ ولايت کونړ کې بيا د ملي امنيت يو کارکوونکى د مځکني ماين د چاودنې له امله وژل شوى دى .

دغه پېښه د ديورنډ کرښې ته نژدې د سرکاڼو په ولسوالۍ کې وشوه .